बेंसीसहर : पक्की धावन मार्ग बनेको ६ वर्षपछि गत भदौ २७ गते हिमाली जिल्ला मनाङमा जहाज पुग्यो । परिक्षण उडानका लागि गएको समिट एयरबाट हुम्डे विमानस्थल ओर्लिएका गण्डकी प्रदेशका मुख्यमन्त्री पृथ्वीसुब्बा गुरुङ र उद्योग, पर्यटन, वन तथा वातावरणमन्त्री विकास लम्सालले असोज १० गतेदेखि मनाङमा नियमित हवाई उडान हुने भाषण गरे।
'असोज १० गते दिनभर जहाज आउँछ की भनेर आकाशमा हेर्दैमा बित्यो, तर जहाज आएन,' मनाङ ङिस्याङ गाउँपालिका ४, हुम्डेकी छ्युङदा गुरुङले भनिन्, 'जहाज आउँछ भनेर भाषण गरेको तीन महिना बित्यो जहाज देख्न पाइएन ।' हुम्डेमा जहाज चलाउने नेताको प्रतिवद्धता भाषणमै सीमित भएको उनले बताइन् ।
मुख्यमन्त्री, मन्त्री, सांसदले भनेपछि धेरैले असोज १० गतेदेखि नियमित जहाज आउँछ भन्ने ठानेका थिए । तर, मन्त्रीले आश्वासन दिएको ३ महिनामा वित्दा पनि जहाज नआएपछि स्थानीय निरास बनेका छन् ।
मनाङबासीलाई झुक्याइएको यो पहिलो पटक भने होइन् । यसअघि पनि पटकपटक जहाज आउँछ भनेर झुक्काउने गरिएको मनाङ ङिस्याङ गाउँपालिकाका अध्यक्ष कान्छा घलेले बताए । 'मन्त्रीले भनेपछि पत्याउनै पर्यो, 'घलेले भने, 'तर हामीलाई पटक पटक धोका दिइयो ।'
मन्त्री लम्सालले नियमित उडानसँगै मनाङमा ४ दिने प्याकेज बनाउने घोषणा गरेका थिए । आन्तरिक पर्यटन वर्ष २०१९ र नेपाल भ्रमण वर्ष २०२० लाई लक्षित गरेर मनाङको हुम्डे विमानस्थलमा नियमित उडान गरिने उनको भनाई थियो । तर, मन्त्रीको कुरा भाषणमै सीमित भयो ।
पर्यटन व्यवसायी समिति मनाङका अध्यक्ष विनोद गुरुङले जहाज उडान नहुँदा मनाङवासी समस्यामा परेको बताए । उनले सरकारी उदासिनताका कारणले मनाङीलेमात्रै नभएर पर्यटकले जहाज चढ्न नपाएको बताए । 'हामीलाई पटक पटक झुक्काइयो, 'उनले भने, 'बरु नसक्ने भए सकिदैन भन्दा राम्रो हुन्छ ।'
अहिले मनाङमा दैनिक २ सय ५० बढी पर्यटक आउने गरेका छन् । अधिकांश पर्यटक पोखराबाट आउने गरेका छन् । जहाज उडान हुन सके कम समय भएका उडानबाटै मनाङ आउन सक्ने उनले बताए ।
उद्योग, पर्यटन, वन तथा वातावरणमन्त्री विकास लम्सालले मनाङमा जहाज लाने पहल भइरहेको बताएका छन् । 'यसअघि विविध कारणले भएन । हामी छलफलमै छौं,' उनले भने । उडानको लागि समिट एयर र राष्ट्रिय ध्वजाबहाक नेपाल वायु सेवा निगमको जहाजसँग छलफल चलाएको उनले बताए ।
नागरिक उड्डयन प्राधिकरणले आर्थिक वर्ष ०६९÷७० मा ९ करोड रुपैयाँ खर्च गरेर धुले धावनमार्गलाई विस्तार गरी कालोपत्रे गरेको थियो । ६ सय मिटरको धावन मार्ग ९ सय मिटर बनाइएको छ । धावनमार्ग कालोपत्रे भएपछि तत्कालीन मन्त्री तथा प्राधिकरणका अधिकारी चढेर मंसिरमा धावनमार्गमा हवाइजहाज परिक्षण गरिएको थियो । २०७० देखि हुम्डे विमानस्थल बन्द थियो ।
कालोपत्रे भएको २ वर्षपछि तारा एयरको डोर्नियर जहाजले परिक्षण उडान गरेपनि त्यसयता कुनै पनि जहाज मनाङ आएको छैन । गतवर्ष एउटा ट्वीनअटर जहाजले चार्टर उडान भरेको थियो । पछिल्लो समय गएको पुस २४ र असार २० मा जहाज उडाउने तयारी गरिएपनि सफल भएको थिएन ।
धावनमार्ग विस्तार र कालोपत्रे हुनुअघि साताको २ पटक उडान हुन्थ्यो । मनाङसम्म सडकको ट्रयाक खुलेपछि हवाईजहाजले उडान नगरेको स्थानीयको भनाइ छ । मनाङमा नेपाल वायु सेवा निगमको ट्वीनअटर जहाजले मात्रै उडान भर्दै आएको थियो ।
पोखरा-मनाङ उडानमा करिब २५ मिनेट लाग्छ । हुम्डे विमानस्थलमा २०३९ साल असोजबाट उडान सुरु गरिएको थियो ।त्यतिबेला हप्ताको दुइदिन उडान गरिन्थ्यो ।नागरिक उड्डयन प्राधिकरणका एयर ट्राफिक कन्ट्रोलर सूर्यबहादुर खत्रीले हिमपात र पानी परेको समय मनाङको आकासमा उडान भर्न नसकिने बताए ।
गत भदौ २७ गते परिक्षण उडानका लागि पोखराबाट हुम्डे विमानस्थल पुगेको समिट एयरको जहाज। तस्बिर : अन्नपूर्ण
प्रतिक्रिया दिनुहोस !
