सुर्खेत : हुम्लाको खार्पुनाथ गाउँपालिकामा मत गणना सुरु भएको छ । राजनैतिक दलका प्रतिनिधि र निर्वाचन टोलीबीच मत गणनाको विषयमा सामान्य विवाद हुँदा मतगणना हुन सकेको थिएन । दलका प्रतिनिधिले मतदान केन्द्रअनुसार मतगणना हुनुपर्छ भन्ने दावी गरेपछि निर्वाचन टोलीले नियम अनुसार कम्तीमा दुईवटा मतदान केन्द्रको मत मिसाएर गणना गर्ने अडान लिएका थिए ।
शनिबार मतदान सम्पन्न पछि मतदान स्थलबाट गाउँपालिका केन्द्रमा मतपेटिका पुर्याउन समेत ढिलाइ भएको थियो । लामो छलफल तथा सर्वदलीय बैठकको निर्णयपछि आइतबार दिउँसोबाट मतगणना सुरु भएको हो ।
जिल्ला निर्वाचन अधिकारी महेश शर्माका अनुसार पछिल्लो मतपरिणामअनुसार नेपाली कांग्रेसका उम्मेदवार तारा शाही ४९ मतले अघि छन् । १३ सय ५१ मत गणना हुँदा उनले ६ सय ९६ मत प्राप्त गरेका छन् । नेकपाका उम्मेदवार रुपा शाहीले ६ सय ४७ र राप्रपा संयुक्तका उम्मेदवार दीपबहादुर शाहीले ४ मत प्राप्त गरेका छन् ।
त्यस्तै, ४ मत बदर भएको छ । कुल ३३८७ मतदाता रहेको खार्पुनाथमा २८७९(८४.७ प्रतिशत) मत खसेको थियो। यहाँ गाउँपालिका उपाध्यक्ष पदका लागि उपनिर्वाचन भएको हो।
प्रतिक्रिया दिनुहोस !
