कास्कीमा विद्याको शानदार जित : साझा पार्टी पाँचौँ हुँदा पनि जमानत जफत
मंसिर १५, २०७६ आइतबार २१:३६:०
पोखरा : नेकपा उम्मेदवार विद्या भट्टराई कास्की क्षेत्र नम्बर २ बाट प्रतिनिधिसभा सदस्य निर्वाचित भएकी छन्। यसअघि जितमा ह्याट्रिक गरेका तत्कालीन एमाले सांसद एवं मन्त्री रवीन्द्र अधिकारीकी पत्नी भट्टराईले उपनिर्वाचनमा विजय हासिल गरेकी हुन्।
उनले २४ हजार ३ सय ९५ मत प्राप्त गर्दा उनका निकटतम् प्रतिस्पर्धी कांग्रेसका खेमराज पौडेल ८ हजार ४ सय ३ मतले पछि परे। पौडेलले १५ हजार ९ सय ८३ मत मात्र ल्याएका छन्। विभिन्न दलका १० र स्वतन्त्र ११ गरी २१ उम्मेदवार चुनावी मैदानमा थिए। विजयी र मुख्य प्रतिस्पर्धीबाहेक अन्य उम्मेदवारको जमानत जफत भएको छ।
तेस्रो स्थानमा समाजवादीका धर्मराज गुरुङले १ हजार ९ सय २२ मत प्राप्त गरे। चौथो स्थानको मत राप्रपा नेपालले प्राप्त गर्यो। उक्त पार्टीका रोमबहादुर भण्डारीले १ हजार १ सय ५३ मत ल्याए। वैकल्पिक राजनीतिको वकालत गर्दै आएको साझा पार्टीकी उम्मेदवार रजनी केसी ९ सय ४२ मतसहित पाँचौं भइन्।
यो निर्वाचन क्षेत्रमा ७१ हजार ८ सय ७१ मतदाता थिए। तर, शनिबारको उपनिर्वाचनमा ४५ हजार ५ सय ६३ मत मात्र खसेको थियो। त्यसमध्ये ६ सय मत बदर भएको मुख्य निर्वाचन अधिकृतको कार्यालयले जनाएको छ। मन्त्री अधिकारीको गत फागुन १५ गते हेलिकोप्टर दुर्घटनामा निधन भएपछि यहाँ उपनिर्वाचन भएको हो।
अधिकारीले २०७४ को निर्वाचनमा कांग्रेसका देवराज चालिसेलाई ८ हजार ५ सय ४२ मतान्तरले पराजित गरेका थिए। उपनिर्वाचनमा भट्टराईले रवीन्द्रको विरासत थामेकी छन्। उनले यो जितलाई रवीन्द्र अधिकारी र आफूप्रतिको भरोसाका रूपमा लिएको प्रतिक्रिया दिएकी छन्। उनले मतदाता, दलसहित अन्य उम्मेदवारले सुसंस्कृत राजनीतिक संस्कार देखाएको भन्दै प्रतिस्पर्धी कांग्रेसका खेमराज पौडेललाई धन्यवाद दिएकी छन्। पौडेलले मतगणनास्थलमै पुगेर उनलाई बधाई दिए।
यो क्षेत्रमा पोखरा महानगरपालिकाका ११ वडा छन्। स्थानीय निर्वाचनमा अधिकांश वडामा नेकपाले जित हासिल गरेको थियो। वडा नम्बर ४, ९ र ११ मा भने कांग्रेस उम्मेदवारले जितेका थिए। उपनिर्वाचनमा नेकपाले नौ वडामा अग्रता लियो। कांग्रेसको पकड मानिएको वडा नम्बर ९ मा नेकपाले ३ सय मतले अग्रता कायम ग¥यो। वडा नम्बर ११ र ४ मा मात्र कांग्रेसले अग्रता लियो।
भट्टराई विद्यार्थी आन्दोलनबाट राजनीतिमा लागेकी थिइन्। अधिकारीसँग बिहे भएपछि उनी राजनीतिबाट टाढिएकी थिइन्। उपनिर्वाचनकै लागि उनले त्रिभुवन विश्वविद्यालयको उपप्राध्यापकबाट राजीनामा दिएकी थिइन्।
६० वर्षदेखि राजनीतिमा क्रियाशील ७४ वर्षे पौडेल जिल्लामा कांग्रेसका निष्ठावान् नेता मानिन्छन्। उनको उम्मेदवारी हुँदा कांग्रेसको पुरानो रोग अन्तर्घात अन्त्य हुने विश्वास गरिएको थियो। 
प्रतिक्रिया दिनुहोस !
