बागलुङ दुर्घटनामा मृतकको संख्या १५ पुग्यो, बेपत्ता भनिएका मृत भेटिए

बागलुङ : जिल्लाको पश्चिम बडिगाड गाउँपालिकामा मंगलबार भएको जीप दुर्घटनामा मृत्यु हुनेको संख्या १५ पुगेको छ। मध्यपहाडी लोकमार्गको बागलुङ बुर्तिबाङ सडकखण्डको छेउबाट करिब ३ सय मिटर तल बडिगाड खोलामा खस्दा बेपत्ता भएका इश्मा गाउँपालिका ४ का ६५ वर्षीय धनबहादुर कार्की बुधबार मृत अवस्थामा भेटिएका हुन्।

कार्कीको शव दुर्घटनास्थल भन्दा केही तल बडिगाड ७ दिच्छेमा खोलाले बगाएको अवस्थामा फेला पारेको इलाका प्रहरी कार्यालय भिमगिठेका प्रहरी निरीक्षक रिणबहादुर बैदवारले बताए ।

दुर्घटनामा गम्भीर घाइते भएकाको महाराजगञ्जस्थित त्रिवि शिक्षण अस्पतालमा उपचार भइरहेको छ । घाइते तीनैजनालाई ढोरपाटनस्थित बुर्तिबाङ अस्पतालमा सामान्य उपचारपछि हेलिकप्टरमार्फत काठमाडौं लगिएको थियो । 

गुल्मीको इश्मा गाउँपालिका वडा नम्बर ५ दोहोली कैयापाटाबाट बागलुङको निसीखोला गाउँपालिका १ बायखोला तर्फ जाँदै गरेको ग १ ज ५२१९ नम्बरको जीप बडिगाड गाउँपालिका ७ भिमगिठेको घोकर्नामा दुर्घटनामा परेको थियो ।

गुल्मीको इश्मा गाउँपालिकाबाट २६ जना यात्रु बोकेर आएको जीप दुर्घटना हुनुभन्दा करिब आधाघण्टा अगाडी ग्वालीचौरको खौलारामा ट्राफिक कारवाहीमा परेको थियो । ट्राफिक प्रहरीले ओभरलोड भएको भन्दै आठजनालाई सोही स्थानमै झारेर लोकल भ्यानमा पठाइएको थियो । भ्यानमा पठाएका कारण ८ जना सकुशल छन् । अन्य १५ जनाको भने घटनास्थलमै मृत्यु भएको थियो । 

बुधबार हुने निसीखोलाको बायखोलामा कार्की बन्धुहको कुलपूजाका लागि जाँदै गर्दा दुर्घनामा परेका थिए। निसीखोलामा बुधबार कुल पुज्ने कार्यक्रम थियो । दुर्घटनापछि कार्की गाउँ शोकमा डुबेको छ।