काठमाडौं : भृकुटीमण्डपमा जारी जुत्ता महाकुम्भ महासेल मेलामा उपभोक्ताको भीड लागेको छ । मंसिर ६ गतदेखि सुरु भएको यो मेलामा झन्डै ३० हजारले अवलोकन गरेको आयोजक एवं केटीएम सुजका प्रबन्ध निर्देशक प्रमोद महतोले जानकारी दिए ।
मेलामा आएका अधिकांश व्यक्ति खाली हात नगएको उनको भनाइ छ । 'आउनेमध्ये अधिकांशले कम्तीमा एक जोर किनेरै गएका छन्', उनले भने । पुस ५ गतेसम्म चल्ने मेलामा जुत्ता बिक्री गर्न भ्याइनभ्याइ छ । मंसिर विवाहको सिजन भएकाले जुत्ताको माग बढेको हो । मेलामा आउने अधिकांश ग्राहक बिहेका लागि जुत्ता किन्न आउने महतोले बताए ।
जाडोयाममा क्लोज सुजको माग बढी हुन्छ । केही समयअघि महिनैपिच्छे जुत्ता आयोजना हुन थालेपछि मेलाको आकर्षण घटेको थियो । भारतीय नाकाबन्दीपछि जुत्ता बिक्री गर्न व्यवसायी पटकपटक मेला आयोजना गरिरहन्थे । अहिले त्यो अवस्था नरहेको महतोको बुझाइ छ । 'यो मेला अरु बेलाजस्तो पुरानो सामान बेच्ने, स्टक क्लियर गर्ने मनसायले आयोजना गरिएको होइन', उनले भने, 'मेलामा जुत्ता किनेको छोटो समयमै च्यातिने, खुइलिने गरेको गुनासो आइरहेका छन् । तर, यसमा त्यस्ता पुराना जुत्ता राखिएका छैनन् ।'
यो मेलामा फ्रेस प्रडक्ट मात्रै राखिएको उनले जानकारी दिए । उनका अनुसार विवाहको सिजनलाई लक्ष्य गरी २५ डिजाइनका नयाँ जुत्ता सार्वजनिक गरियो । उनले भने, 'ती जुत्ता उत्पादन मूल्यका आधारमा बिक्री गरिरहेका छौं । ९ सय रुपैयाँदेखि २५ सयसम्म जुत्ता मेलामा छन् । एक हजारभन्दा बढी डिजाइन हामीसँग छ । यो बिल्कुलै नयाँ डिजाइनका जुत्ता पाइन्छ । विवाहमा जानुपर्ने ग्राहकका लागि निकै उपयोगी छ ।'
यो मेलामा जुत्ता बिक्री मात्र नभई जुत्ताको गुणस्तरबारे परामर्श दिइरहेको महतोले जानकारी दिए । उनले भने, 'हामी यहाँ जुत्ता मात्रै बेच्दैनौं, उपभोक्तालाई जुत्ताको गुणस्तरबारे जानकारी गराउँछौं । मेलापछि पनि हामीलाई व्यवसाय गर्नुपर्नेछ ।'
९ वटा ब्रान्ड सहभागी यो मेलामा दुई वटा कम्पनीले महिलाले लगाउने जुत्ता बिक्री गरिरहेका छन् भने बाँकी सातवटाले अन्य जुत्ता प्रस्तुत गरेका छन् ।
प्रतिक्रिया दिनुहोस !
