मलंगवा : हरिपूर्वा नगरपालिका–५ स्थित श्री केशर गरिब जनता उच्च माध्यमिक विद्यालयका विद्यार्थीहरुले शुक्रबार हरिपूर्वा नगरपालिकाको कार्यालय तोडफोड गरेका छन् ।
प्राविधिकतर्फ पढाइ हुने सिभिल इन्जिनियरिङका विद्यार्थीहरुले विद्यालयमा प्राविधिकतर्फको शिक्षक नरहेको र शिक्षक भर्नामा नगरपालिकाले कुनै चासो नदेखाएको भन्दै कार्यालय तोडफोड गर्न पुगेका हुन् ।
शिक्षक अभावमा ८ महिनादेखि प्राविधिक तर्फका कुनै पनि विषयको पढाइ हुन सकेको छैन । विद्यार्थीहरुले कार्यालयको कम्प्युटर, टेलिभिजन, फर्निचरका समान तोडफोड गरेको नगरपालिकाले जनाएको छ ।
शिक्षक भर्नाका लागि नगरपालिकामा पटक पटक ताकेता गर्दा पनि कुनै सुनुवाइ नभएको प्राविधिकका विधार्थी अञ्जना साहले बताइन् । शिक्षक अभावमा ८ महिनादेखि प्राविधिकतर्फका कुनै पनि विषय पढाइ हुन नसकेको साहले बताइन् ।
शिक्षक भर्नाका लागि नगरपालिकामा गुनासो गर्न जाँदा विधार्थीमाथि नै नगरपालिकाका एक कर्मचारीले हेलमेटले आक्रमण गरेपछि विद्यार्थीहरु आन्दोलित बनेको बताएका छन् ।
प्रधानाध्यापकलाई कार्यकारी अधिकृत सकलदेव रायले दुव्र्यवहार गरेको विद्यार्थीहरुको गुनासो छ । नगरपालिका कार्यालयमा रहेका कुर्सी, टेबल, कम्प्युटर, टेलिभिजन लगायत समान विद्यार्थीले तोडेका छन् । करिब २०/२५ लाखको क्षति भएको नगरपालिकाका कर्मचारीहरुको दावी छ ।
नगरपालिकाका कर्मचारी भन्छन् : शिक्षकले उक्साए
शिक्षक माग गर्न प्रधानाध्यापकले नै विद्यार्थीलाई उक्साएर नगरपालिकामा पठाएको कार्यकारी अधिकृत रायको आरोप छ । विद्यार्थीहरुले करिब ३ घण्टासम्म कार्यालयभित्र पसेर तोडफोड गरेको उनले आरोप लगाए ।
उच्चमाविमा प्राविधिकतर्फ पढाउन एक इन्जिनियर र दुई सबओभरसियर नियुक्तिमा अनियमितता भएको भन्दै मुद्दा अख्तियारमा छ । तर, यसबीचमा प्रधानाध्यापककै कमजोरीका कारण शिक्षक भर्ना हुन नसकेको नगरपालिकाका अधिकारीको जिकिर छ ।
प्रधानाध्यापक रामप्रित महतो भने आफू एक साताअघि मात्रै सरुवा भइ विद्यालयमा आएको र स्कुल र नगरपालिका बारे जानकारी नभएको बताउँछन् । आक्रोशित विधार्थीहरुले विद्यालयमा समेत तालाबन्दी गरेका छन् । यसअघि पनि शिक्षक भर्नामा अनियमितता भएको भन्दै केही विद्यार्थी तथा अभिभावकले विद्यालयमा तालाबन्दी गरेका थिए ।
प्रतिक्रिया दिनुहोस !
