काठमाडौं : नेपालको गलैंचा उद्योगलाई बाल श्रममुक्त बनाउने अभियानमा सक्रिय नेपाल गुडविभ फाउण्डेसनको साधारण सभाले नयाँ कार्यसमिति चयन गरेको छ । गलैंचा उद्यमी समिकविक्रम शाहको नेतृत्वमा रहेको उक्त कार्यसमितिमा उपाध्यक्ष युवराज विद्रोही, महासचिव किरण थापा, कोषाध्यक्ष दावा शेर्पालाई चयन गरेको छ । यस्तै सदस्यमा लिलाधर भण्डारी, कृष्णेश्वरी हाडा, बलराम गुरुङ, धनबहादुर तामाङ चयन भएका छन् ।
प्रत्येक दुई वर्षमा आयोजना हुने साधारण सभामा ४ जना गलैंचा क्षेत्रका व्यवसायी र ४ जना बालअधिकारका क्षेत्रमा कार्यरत संस्थाका प्रतिनिधि चयन हुने व्यवस्था संस्थाको विधानअनुसार पदाधिकारी र सदस्य चयन गरिएको हो । एकजना सदस्य कार्यसमितिको पहिलो बैठकले मनोनित गर्ने व्यवस्था रहेको छ ।
नेपालमा गलैंचा कारखानामा बाल श्रममुक्त बनाउने अभियानअन्तर्गत व्यवसायी र गैरसरकारी संस्थाका प्रतिनिधिको साझा प्रतिनिधित्व हुने गरी गुडविभको कार्यक्रम सञ्चालनमा रहँदै आएको छ । प्रदेश सांसद रामबहादुर गुरुङले उद्घाटन गरेका अधिवेशनमा गलैंचा उद्योगी, बालअधिकारसँग सम्बन्धित संस्थाका प्रतिनिधि, बालबालिका, सरकारी निकायलगायतका प्रतिनिधिले बाल श्रमरहित गलैंचा उत्पादन र गलैचा व्यवसायलाई प्रवद्र्धन गर्नका लागि सरकारको ध्यानाकर्षण गराएका थिए ।
कार्यक्रममा वरिष्ठ अधिवक्ता तथा बालअधिकारकर्मी बिनोद कार्कीले बाल श्रम अन्त्यका लागि आगामी दिनमा नयाँ कार्यदिशा सहित कार्यक्रम संचालन गर्नुपर्ने धारणा राखे । कार्यक्रममा राष्ट्रिय बालअधिकार परिषद्का प्रशासकीय प्रमुख कृष्ण प्रसाद भुषाल, कागेश्वरी मनोहराका मेयर र प्रदेश सभाका सांसद गुरुङले सरकारले बाल श्रम अन्त्यका लागि योजनासहित कार्यक्रम संचालन गर्ने प्रतिवद्धता जनाए ।
निवर्तमान अध्यक्ष सपुतबहादुर कार्कीले नेपालको कार्पेट क्षेत्रलाई बाल श्रममुक्त बनाउनका लागि गुडविभले महत्वपूर्ण भूमिका निभाएको बताए ।
प्रतिक्रिया दिनुहोस !
