दराजको मेला सुरु

काठमाडौं : चिनियाँ अनलाइन सपिङ प्लेटफर्म अलिबाबाको सहायक कम्पनी दराजको किनमेल मेला सुरु भएको छ। मेला २६ मंसिरदेखि २ पुससम्म सञ्चालनमा आउनेछ। 'दराज १२.१२' नामक उक्त मेलामा नेपाली र विदेशी ब्रान्डका वस्तुमा ६० प्रतिशतसम्म छुट दिइएको छ।

सोही अवसरमा मेगा डिल, क्रेजी भौचरजस्ता उपहार योजना सञ्चालन गर्ने दराजले जनाएको छ । सोही अवसरमा 'मिसन १२.१२' र 'वान रुपी गेम' जस्ता रमाइला खेलमा ग्राहकले भाग लिन पाउने र थुप्रै उपहार प्राप्त गर्ने बताइएको छ । उपभोक्ताले दराजका पार्टनर बैंकका डेबिट र क्रेडिट कार्ड प्रयोग गरेर अनलाइन भुक्तानी गर्दा थप २० प्रतिशत छुट पाउने व्यवस्था गरिएको छ । यस्तो छुट भने १ हजार ५ सय रुपैयाँसम्म पाइनेछ ।

अलिबाबाले नोभेम्बर ११ लाई लक्ष्य गरी ‘११.११’ किनमेल मेला सञ्चालन गर्दै आएको थियो । अलिबाबाले दराजको स्वामित्व किनेपछि नेपालमा पनि दराज प्लेटफममार्फत यस्तो मेला सञ्चालन गर्न थालियो । अहिले दराजले मध्ये-डिसेम्बरमा नयाँ किनमेल मेला सुरु गर्न लागेको हो । 'दराज ११.११' मा दराज एप र वेबसाइटमा ३.५ लाखभन्दा बढी प्रयोकर्ताको उपस्थिति थियो' दराजको वक्तव्यमा भनिएको छ, 'जुन पोहोरको भन्दा ७५ प्रतिशत बढी हो ।' 

यो वर्षको ११.११ मा ३ हजारभन्दा बढी विक्रेता र ५० हजारभन्दा बढी उपभोक्ता थिए । सोही मेलामा दराजले २४ सहरमा डेढलाखभन्दा बढी सामानको व्यापार गरेको थियो । 'दराज ११.११' र 'ब्ल्याक-फ्राइडे' को सफलतापछि विक्रेताका लागि 'सुपर नोवेम्बर' हुन पुगेको दराज नेपालका प्रबन्ध-निर्देशक लिनो अलरिङले बताए । उनले '११.११' को फाइदा उठाउन नपाउनेलाई समेट्न थप नयाँ डिल लिएर आएको बताए ।