सिन्धुपाल्चोक बस दुर्घटना अपडेट : १४ को मृत्यु, ६ को सनाखत, १८ जना घाइते

खाडीचौर ( सिन्धुपाल्चोक) : दोलखाको प्रख्यात तीर्थस्थल कालिञ्‍चोकबाट भक्तपुर फर्कदै गरेको बस खाडीचौर जिरी सडकको छ किलो भन्ने ठाउँमा भएको दुर्घटनामा मृत्यु हुनेको संख्या १४ जनाको पुगेको छ। मृतकमध्ये ५ जनाको सनाखत भएको छ।

सनखत हुनेमा जुगल गाउँपालिक ७ याङ्लाकोट सिन्धुपाल्चोकका २८ वर्षीय शुकबहादुर तामाङ, सोही ठाउँकी ५ वर्षीया बालिका सविना तामाङ, भिमेश्वर नगरपालिका दोलखाकी ३७ वर्षीया जुनमाया तामाङ, सोही ठाउँकी मञ्जु तामाङ, उमाकुण्ड गाउँपालिका ५ रामेछापका २८ वर्षीय महेश तामाङ र सूर्यविनायक नगरपालिका ८ बस्ने ३२ वर्षीया चिनु बस्नेतको सनाखत भएको जिल्ला प्रहरी कार्यालय सिन्धुपाल्चोकका प्रहरी नायव उपरीक्षक माधवराज काफ्लेले जानकारी दिए।

अन्य शवको भने पहिचान हुन सकेको छैन । शव पोष्टमार्टमका लागि बाह्रबिसे प्राथमिक स्वास्थ्य केन्द्रमा राखिएको प्रहरीले जनाएको छ । दुर्घटनाका घाइतेमध्ये १४ जनाको राजधानीको ह्याम्स हस्पिटलमा र बाँकी चारको धुलिखेल अस्पतालमा उपचार भइरहेको छ । उपचाररत सबै घाइतेको अवस्था गम्भीर रहेको ह्याम्स हस्पिटलका अध्यक्ष आरएस भण्डारीले बताए ।

भक्तपुरबाट तिर्थयात्रा रिर्जभ गएको बा २ ख ४४६८ नम्बरको बस सुनकोशी गाउँपालिकाको छकिलो भन्ने ठाउँमा सडकबाट ७० मिटर तल खस्दा तीन बालबालिकासहित १४ जनाको मृत्यु भएको हो। मृतकमध्ये ९ महिला र छ पुरुष रहेको प्रहरीले जनाएको छ । दुर्घटनामा परी १८ यात्रु घाइते भएका छन् ।