मेलम्ची : मेलम्ची नगरपालिका–८, क्यौरानीकी सिता गिरीलाई केही महिना अघिसम्म खानेपानीको चिन्ताले रातभर निद्रा लाग्दैनथ्यो ।
राति छिमेकी गाउँमा लगेको पाइप लाइनबाट पानी चोर्न नपाए भोलि बिहान पानी थाप्न घण्टौ कुर्नुपर्ने बाध्यताले उनी निदाउन सक्दैनथिइन् । केही महिनायतादेखि भने गाउँमै खानेपानी योजना सञ्चालनमा आएपछि सीता र उनका छिमेकीलाई पानी चोर्नुपर्ने बाध्यता टरेको छ ।
सेवक नेपाल र जनहित ग्रामीण सेवा समितिको साझेदारीमा सिस्नेखोला रामदल टोल खानेपानी योजना सम्पन्न भएपछि छिमेकी गाउँमा लगेको लाइनबाट पानी चोर्नुपर्ने बाध्यता टरेको हो ।
यो योजना सम्पन्न हुनुअघि पल्लो गाउँमा लगेको लाइनबाट राति पानी चोरेर दैनिक उपभोगका लागि खानेपानीको जोहो गथ्र्यौं, स्थानीय गृहिणी नक्कली गिरीले भनिन्, ‘यो योजना सम्पन्न भएपछि हामीलाई पानीको चिन्ताले सताउन छाडेको छ ।’
भूकम्पपछि आफ्नो थलोमा घर बनाउन सम्भव नभएका कारण नया ठाउँमा सरेका स्थानीयले खानेपानी समस्या भोग्नुपर्दा यो योजना सञ्चालनमा ल्याएको उपभोक्ता समितिका अध्यक्ष हरिलाल गिरीले बताए ।
गिरी भन्छन्, ‘गाउँमा खानेपानी नहुँदा छिमेकी गाउँमा लगेको लाइनबाट पानी चोर्नुपथ्र्यो । हरेक रात पानी चोर्दा छिमेकीसँग समेत दुस्मनी बढ्न थालेको थियो ।’ दातृ संस्था र स्थानीय जनसहभागिता समेत गरी १० लाख ५८ हजार छ सय २९ रुपैयाँको लागतमा योजना सम्पन्न भएको जनहितका कार्यक्रम संयोजक प्रकास नेपालले बताए ।
खानेपानी योजना अन्तर्गत ३३ परिवारले उपभोग गर्ने गरी नौ वटा धारा सञ्चालनमा ल्याइएको सेवककी प्राविधिक अनिता नेपालले जानकारी दिइन् । करिव एक किलोमिटर टाढाबाट गाउँमा खानेपानी ल्याइएको छ । योजना सम्पन्न भएपछि पनि सफा खानेपानीलाई निरन्तरता दिन जनहितले आवश्यक सहजीकरण तथा मर्मत सम्भार कोषको व्यवस्था गरेको कार्यक्रम निर्देशक राजेन्द्र शर्माले बताए ।
प्रतिक्रिया दिनुहोस !
