परासी : केही दिनदेखि शीतलहर बढेपछि जिल्ला प्रशासन कार्यालय पश्चिम नवलपरासीले सार्वजनिक अपिल निकालेर सर्वसाधारणलाई सचेत गराएको छ । हप्ता दिनदेखि जिल्लामा बाक्लो हुस्सु र मसिनो पानीको थोपासँगै चिसो हावा चलेपछि जनजीवन कष्टकर बन्दै गएको छ ।
चिसोले जनजीवन कष्टकर बन्दै गएपछि जिल्ला प्रशासन कार्यालयले त्यसबाट जोगिन सर्वसाधारणलाई स्थानीय सञ्चारमाध्यम मार्फत सर्वसाधारणलाई सचेत गराएको हो । चिसोबाट सबैभन्दा बढी सडकमा बस्ने बेसहारा व्यक्ति प्रभावित भएपछि जिल्ला प्रशासनले कम्बल वितरण गरेको छ। स्थानीय तहहरुले चोक÷चोकमा आगो ताप्न दाउरा वितरण गर्न थालेका छन् ।
चिसो बढेपछि जिल्ला विपद् व्यवस्थापन समितिले जिल्लामा विपन्न समुदायको तथ्यांक निकालेर राहतका कार्यक्रमसमेत अघि बढाएको छ । विपद् व्यवस्थापन समितिका अध्यक्ष एंव प्रमुख जिल्ला अधिकारी शम्भु प्रसाद मरासिनीले जिल्लामा १० हजारको हाराहारीमा विपन्नको संख्या रहेको बताए ।
जिल्लामा तीन नगरपालिका र चार गाउँपालिका छन् । विपन्नको संख्या बर्दघाट नगरपालिकामा सबैभन्दा बढी छ । यहाँ २ हजार ९ सय ८७ विपन्न समुदायको संख्या रहेको विपद् व्यवस्थापन समितिले जनाएको छ । त्यसैगरी रामग्राम नगरपालिकामा १ हजार ५ सय ६४ जना विपन्नको संख्या छ ।
सुनवल नगरपालिकामा ५ सय ६० र सुस्ता गाउँपालिकामा १ हजार ५ सय ७५ विपन्नको संख्या छ । त्यस्तै प्रतापपुरमा १ हजार ३ सय ५०, पाल्हीनन्दनमा ८ सय ५९ र सरावलमा ७ सय ५० परिवार विपन्न समुदायको संख्या रहेको छ । चिसोबाट सबैभन्दा बढी उनीहरु प्रभावित हुने भएकाले सरकारी कार्यालय, स्थानीय तह र संघसंस्थाको समन्वयमा कम्बल र न्यानो कपडा वितरणको व्यवस्था गरिएको प्रजिअ मरासिनीले बताए ।
न्यानो कपडा वितरण अन्तरगत जिल्ला प्रशासन कार्यालयको अनुरोधमा सुस्ता गाउँपालिकाका २ सय बढी विपन्न समुदायलाई निजामती कर्मचारी श्रीमती संघ केन्द्रीय समितिले २ सय थान ब्याल्याङकेट वितरण गरेको छ । 'प्रभावित समुदायलाई कम्बल वितरण गर्न रेडक्रस, विभिन्न संघसंस्था र स्थानीय तहसँग समन्वय गरेका छौं।' राहतका लागि कुनै कमि हुन दिदैनौं । आवश्यकताअनुसार कम्बल वितरण सुरु गरेका छौं, 'प्रजिअ मरासिनीले भने ।
चिसो बढेपछि सडक, सवारीसाधन र सरकारी कार्यालयमा सर्वसाधारणको चहलपहल न्यून छ । यसैबीच चिसोले मुटु, श्वासप्रश्वास, बाथरोग, कोल्ड डाइरेरिया, निमोनिया, ज्वरो र रुघाखोकीका बिरामीको संख्या बढेको पृथ्वीचन्द्र जिल्ला अस्पताल परासीका मेडिकल सुपरिटेण्डेण्ट डा. मोहम्मद नुरुल होदाले बताए । चिसोमा न्यानो कपडा लगाउन र झोलिलो पदार्थ खान चिकित्सकहरुले सुझाव दिएका छन्।
प्रतिक्रिया दिनुहोस !
