लक्ष्मी बैंकले १० प्रतिशत बोनस शेयर र ५ प्रतिशत नगद लाभांश दिने
पुष ७, २०७६ सोमबार १२:१:०
काठमाडौं : लक्ष्मी बैंक लिमिटेडको १९ औं वार्षिक साधारणसभा सम्पन्न भएको छ । साधारण सभाले बैंकको चुक्ता पूँजीको १० प्रतिशत बोनस शेयर र ५ प्रतिशत नगद लाभांश वितरण गर्ने प्रस्ताव पारित गरेको छ । पारित बोनस शेयरसँगै बैंकको चुक्ता पूँजी ९ अर्ब ८१ करोड पुगेको छ ।
साधारण सभाले आर्थिक वर्ष २०७५/७६ का लागि संचालक समितिको प्रतिवेदन तथा सोही आर्थिक वर्षको बैंकको वित्तीय विवरण उपर छलफल गरी स्वीकृत गरेको छ । साथै साधारण सभाले संस्थापक शेयरधनीका तर्फबाट मनोनित सञ्चालकहरुको नियुक्ति अनुमोदन समेत गरेको छ ।
आव २०७५/७६मा रु ८०.३२ अर्ब निक्षेप र रु ७७.८४अर्ब कर्जा पुर्याएको यस बैंकको वासलातको आकार १०६ अर्ब रहेको छ । सो आवमा बैंकले १ अर्ब ५९ करोडखुद मुनाफा आर्जन गर्न सफल भएको छ । यसका साथ साथै सम्पूर्ण वित्तीय सूचकहरु नियामक व्यवस्थाअनुरुप नै राम्रो अवस्थामा रहेका छन् ।
सन् २००२ मा स्थापना भएको लक्ष्मी बैंकले आफ्ना शाखाहरु तथा सूचना प्रविधिको माध्यमबाट बृहत स्तरमा सेवा प्रदान गर्न सफल भएको छ । तुलनात्मक रुपमा छोटो इतिहासको बाबजुद रिटेल, कर्पोरेट तथा ट्रेजरी जस्ता सम्पूर्ण वित्तीय सेवाको क्षेत्रमा सेवा पुर्याउने एक प्रमुख बैंकिङ्ग सेवाप्रदायकको रुपमा बैंक अगाडि आएको छ ।
लक्ष्मी बैंकको इन्भेष्टमेन्ट बैंकिङ्ग सेवा प्रदान गर्ने सहायक कम्पनी 'लक्ष्मी क्यापिटल मार्केट लि' सन् २००९ देखि संचालनमा छ । यसैगरी दोस्रो सहायक कम्पनी 'लक्ष्मी लघुवित्त वित्तीय संस्था लि.' ले सन् २०१२ बाट कारोबार सुरु गरी लघुवित्त सेवा प्रवाह गरिरहेको छ।
लक्ष्मी बैंकले लक्ष्मी भ्यालु फण्ड १ र लक्ष्मी इक्विटि फण्ड नामक दुई म्यूचुअल फण्ड समेत जारी गरेको छ।
प्रतिक्रिया दिनुहोस !
