सीमा समस्यामा भारतले 'जवाफी पत्र' पठायो, अब कहिले होला वार्ता ?
पुष ८, २०७६ मंगलबार १३:२०:०
काठमाडौं : भारतले कालापानीलाई आफ्नो भू-भागमा समेटेर नयाँ नक्सा सार्वजनिक गरेपछि चर्किएको सीमा विवादलाई सम्बोधन गर्न र समाधान खोज्न तयार रहेको भन्दै नेपाललाई कूटनीतिक नोट पठाएको छ।
भारतले कालापानीलाई आफ्नो भू-भागमा समेटेर नयाँ नक्सा सार्वजनिक गरेपछि यसमा विवाद भइरहेको छ। सीमा समस्या समाधानका लागि उच्चस्तरमा वार्ता गर्नका लागि नेपालले पत्र पठाएको एक महिनापछि भारतले जवाफमा कूटनीतिक नोट पठाएको हो।
भारतले नेपालको जमिनलाई समेत आफ्नो भूभाग दाबी गर्दै नयाँ नक्सा जारी गरेपछि परराष्ट्र मन्त्रालयले एक महिनाअघि त्यसको विरोधमा कूटनीतिक नोट पठाएको थियो।
परराष्ट्रमन्त्री प्रदीप ज्ञवालीले भारतबाट पत्र आएको संचारकर्मीसँग पुष्टि गरेका छन्। तर कस्तो व्यहोराको पत्र आएको भन्नेबारेमा परराष्ट्रमन्त्री र मन्त्रालयले पनि औपचारिक रुपमा केही खुलाएका छैनन्।
ढिलै भएपनि सीमा समस्या स्वीकार गर्दै भारतले औपचारिक पत्र पठाउनुलाई सकारात्मक रुपमा लिइएको छ। यसले समस्या समाधानको बाटोलाई सहज बनाएको र अब वार्ताको संभावना निकट भएको परराष्ट्रका एक अधिकारीले बताए।
नेपालस्थित भारतीय दूतावासमार्फत सरकारलाई सम्बोधन गर्दै पठाइएको पत्रमा 'कालापानी-सुस्ता क्षेत्रको समस्या समाधानका लागि भारत तयार रहेको' उल्लेख छ। पत्रमा आपसी समझदारीमा उपयुक्त समयमा वार्ता गर्न सकिने व्यहोरा उल्लेख छ। नेपालले पठाएको पत्रमा पनि परराष्ट्र सचिवस्तरीय संयन्त्रबाटै यो विषय हल गर्नुपर्ने उल्लेख थियो।
नोभेम्बर २ मा भारतले नयाँ नक्सा सार्वजनिक गरेपछि सिमा विवाद फेरि चर्किएको थियो। भारतले जारी गरेको नयाँ नक्सामा लिम्पियाधुरा र लिपुलेकलाई पनि आफ्नो भूभागको रुपमा समेटिएको छ।
प्रतिक्रिया दिनुहोस !
