भ्रमण वर्षलाई लक्षित गरी किवी महोत्सव

दोलखा : नेपाल भ्रमण वर्ष २०२० लाई लक्षित गरेर दोलखाको सदरमुकाम चरिकोटमा ७ दिने किवी महोत्सव सुरु भएको छ । भीमेश्वर नगरपालिकाद्वारा जनवरी १ मंगलबारदेखि ७ दिने किवी महोत्सवको आयोजना गरिएको हो ।

प्रदेश ३ का भूमि व्यवस्था, कृषि तथा सहकारी मन्त्री दावादोर्जे लामाले महोत्सवको चरिकोटमा भब्य समारोहका बीच उद्घाटन गरे । भीमेश्वर नगरपालिकाका मेयर भरतबहादुर केसीले नेपाल भ्रमण वर्ष २०२० सँगै दोलखाका पर्यटकीय स्थलको प्रचार–प्रसार तथा दोलखामा उत्पादित किवीको बजारीकरणका लागि महोत्सवको आयोजना गरिएको बताए ।
    

मंगलबारबाट सुरु भएको किवी महोत्सब सोमबारसम्म चल्ने आयोजकले जनाएको छ । महोत्सवमा किवी फल, किवीसँग सम्बन्धित उत्पादनहरु, अन्य फलफूल तथा दोलखामा उत्पादित विभिन्न सामग्रीका स्टल राखिएको छ । 

दोलखामा चालु आर्थिक वर्षमा किवी उत्पादक कम्पनी, फर्म, सहकारी तथा कृषकहरुले ४ सय ५० मेट्रिकटन किवी उत्पादन गरेको किवी जोन दोलखाका कार्यालय प्रमुख मोहनप्रसाद खतिवडाले बताए । हालको बजार मूल्यको आधारमा ३ करोड ५० लाखको किवी बिक्री अनुमान उनले गरे ।