धादिङ : धादिङको नीलकण्ठ नगरपालिका ८ मैदी भन्ज्याङ नजिकै मंगलबार भएको मिनिट्रक दुर्घटनामा मृत्यु भएकाको शोकमा बुधबार (आज) स्थानीय सरकारले शोक विदा घोषणा गरेको छ ।
मंगलबार ज्वालामुखी गाउँपालिकाको ४ ढोलामन्दिरमा दर्शन गरेर फर्किँदै गरेका यात्रुहरु चढेको मिनिट्रक दुर्घटना हुँदा एकै गाउँका ७ जनाको मृत्यु भएको थियो भने ३७ जना घाइते भएका थिए । घाइते र मृतक सबैजना नीलकण्ठ नगरपालिका २ भुलभुलेका स्थानीय हुन् ।
मंगलबार नगरपालिकाले सूचना जारी गर्दै मृतकका सबै परिवारजनमा गहीरो समवेदना प्रकट गर्दै दुर्घटनामा परी घाइते सबैको शीघ्र स्वास्थलाभको कामना समेत गरेको छ । घाइते र मृतकको परिवारलाई नीलकण्ठ नगरपालिकाको तर्फबाट सक्दो सहयोग गर्ने प्रतिवद्धता व्यक्त गर्दै नीलकण्ठ नगरपालिकाभरी ८ गतेको लागि शोक विदा घोषणा गरिएको नगरपालिकाका मेयर भीम प्रसाद ढुङगानाले जानकारी दिए।
घटनापछि घाइतेलाई नेपाली सेनाको हेलिकप्टरबाट उद्धार गरी थप उपचारको लागि काठमाडौं पठाइएको थियो । हेलिकप्टर खर्च पनि नगरपालिकाले नै बेहोर्ने ढुङगानाले बताए ।
मंगलबार ज्वालामुखी गाउँपालिका ४ ढोला मण्डलीको दर्शन गरेर फर्किँदै गरेको ग १ ख ८०१२ नम्बरको आइचर ट्रक नीलकण्ठ नगरपालिका ८ स्थित मैदी भन्ज्याङ नजिक अनियन्त्रीत भइ दुर्घटना हुँदा ७ जनाको मृत्यु भएको थियो।
प्रतिक्रिया दिनुहोस !
