टिपरको ठक्करबाट मृत्यु : पाँच बुँदे सहमतिपछि आन्दोलन फिर्ता
माघ १६, २०७६ बिहीबार १६:४५:०
सुर्खेतः वीरेन्द्रनगरमा तीन दिनदेखि जारी आन्दोलन फिर्ता भएको छ । मंगलबार टिपरको ठक्करबाट कालिकोटको महावै गाउँपालिका ३ सिम्खेतका २० वर्षीय केशर सिंहको ज्यान गएको थियो । त्यसपछि पीडित पक्षले वीरेन्द्रनगरमा आन्दोलन चर्काएका थिए ।
बिहीबार जिल्ला प्रशासन कार्यालयमा भएको वार्तापछि पाँच बुँदे सहमति भएको छ । सहमतिसँगै आन्दोलन पनि फिर्ता भएको पीडित पक्षले जनाएका छन् ।
आन्दोलन फिर्ता भएपछि वीरेन्द्रनगर बजार खुलेको छ । सवारी साधन पनि संचालनमा आएका छन् । घटनापछि वीरेन्द्रनगर तनावपूर्ण बनेको थियो ।आन्दोलन नियन्त्रण बाहिर गएपछि प्रशासनले मंगलबार कफ्र्यू लगाएको थियो ।जिल्ला प्रशासन कार्यालयका अनुसार प्रशासन, टिपर मालिक र पीडित पक्षबीच वार्ता भएको थियो ।
सहमतिअनुसार पीडित पक्षले आन्दोलनका सबै कार्यक्रम फिर्ता लिएको प्रमुख जिल्ला अधिकारी बसन्त अधिकारीले जनाए । यस्तै टिपर चालक राजकुमार बोहोराविरुद्ध पीडित पक्षले किटानी जाहेरी दिने र हदैसम्मको कारबाहीका लागि प्रक्रिया अगाडि बढाउने, आन्दोलनमा घाइते भएकाहरुको उपचारका लागि प्रदेश सरकारलाई अनुरोध गर्ने, मृतक केशर सिंहको शव पोस्टमार्टम गरी आफन्तले बुझ्ने र पीडित पक्षलाई कानुन बमोजिम क्षतिपूर्ति उपलब्ध गराउने सहमति भएको छ ।
यसअघि चालकको लापरबाहीले घटना भएको भन्दै स्थानीयले कडा कारबाही र पीडित परिवारलाई उचित क्षतिपूर्ति दिनुपर्ने माग गर्दै आन्दोलन गर्दै आएका थिए । प्रहरीले मृतकका आफन्तको सहमतिबिनै सडकबाट शव उठाएपछि अवस्था थप तनावपूर्ण बनेको थियो। आन्दोलनका क्रममा एक दर्जनभन्दा बढी प्रदर्शनकारी घाइते भएका थिए । यस्तै प्रदर्शनकारीले वीरेन्द्रनगरमा रहेका प्रहरीका बीट र सीसी क्यामेरामा तोडफोड गरेका थिए।
प्रतिक्रिया दिनुहोस !
