काठमाडौं : नेपाली सेनाले विभिन्न परियोजनालाई विस्फोटक पदार्थसँगै 'डेटोनेटर' पनि उपलब्ध गराउने भएको छ । विस्फोटक पड्काउन प्रयोग गरिने डेटोनेटर किन्न उसले प्रक्रिया अघि बढाएको छ । हाइड्रोपावर कम्पनी, सडक निर्माणलगायत परियोजनाले सेनाबाट उत्पादित विस्फोटक पदार्थ प्रयोग गर्दै आएका छन् । सेनाले डेटोनेटर पनि उपलब्ध गराएपछि यी दुवै खरिदमा लाग्ने परियोजनाको खर्च कम हुनेछ ।
तीन महिनाभित्र २८ लाख डेटोनेटर ल्याउने गरी प्रक्रिया बढाइएको सैनिक स्रोतले जनाएको छ । सैनिक सामग्री उत्पादन निर्देशनालयमार्फत सेनाले डेटोनेटर किन्न लागेको हो । डेटोनेटर किन्न सार्वजनिक बोलपत्रमार्फत खरिद प्रक्रिया टुंग्याइएको छ । विस्फोटकसँगै डेटोनेटर किन्दा व्यवसायीलाई सस्तो पर्ने सेनाले जनाएको छ । सैनिक प्रवक्ता एवं सहायक रथी विज्ञानदेव पाण्डेले विभिन्न परियोजनालाई विस्फोटकसँगै डेटोनेटरसमेत दिने तयारी भइरहेको बताए । सेनालाई भारतीय कम्पनीले डेटोनेटर आपूर्ति गर्नेछ ।
सेनाले मकवानपुरको सुनाचुरीस्थित इमल्सन प्लान्टबाट विस्फोटक उत्पादन गर्दै आएको छ । उसले आफूले उत्पादन गरेको विस्फोटकको बजार प्रवद्र्धन सहज बनाएको छ । उसले सुनाचुरीसहित बाँकेको सल्यानगरस्थित स्टोर, महोत्तरीको बर्दिवासस्थित स्टोर र चितवनबाट विस्फोटक पदार्थ वितरणको तयारी छ । सुनाचुरीमा दुईवटा प्लान्टले विस्फोटक पदार्थ उत्पादन गरिरहेका छन् । सेनाको उत्पादन कमसल रहेको आरोप लाग्दै आएको थियो । प्लान्ट नहुँदा विगतमा धेरै विस्फोटक पदार्थ उत्पादन भएको थिएन ।
सेनाले विस्फोटक पदार्थमा आत्मनिर्भर हुन उत्पादन गर्ने नयाँ प्लान्ट चीनबाट किनेको थियो । त्यसबाट उत्पादित विस्फोटकको गुणस्तर प्रभावकारी देखिएको छ ।
सेनाले केही दिनअघि विभिन्न परियोजनाका प्रतिनिधिसामु निर्माणाधीन फास्ट ट्र्याकमा पर्ने सिस्नेरीमा स्वदेशी र विदेशी कम्पनीबाट उत्पादित विस्फोटकको गुणस्तर परीक्षण गरेको थियो । उसले उत्पादन गरेको विस्फोटकको गुणस्तर उच्च पाइएको थियो । देशमा बर्सेनि ५-७ हजार मेट्रिक टन विस्फोटक खपत हुँदै आएको छ ।
प्रतिक्रिया दिनुहोस !
