हेटौंडा : अनेरास्ववियू र अनेरास्ववियु क्रान्तिकारीले कृषि तथा वन विज्ञान विश्वविद्यालयको वन सङ्कायका डीनसहित १० जनालाई विश्वविद्यालयकै सेमिनार हलमा थुनेर तालाबन्दी गरेका छन् । उनीहरुले डीन बलराम भट्ट, सहायक डीन वासुदेव पोख्रेल र भर्ना छनोट समितिका सदस्यसहितलाई थुनेका हुन् ।
विश्वविद्यालयले मेरिट पूर्व जानकारी बिनानै प्रवेश परीक्षा लिएको र परीक्षामा कम अंक आएकालाई भर्ना लिएर बढी अंक ल्याउने विद्यार्थीलाई निजी विद्यालयमा जान बाध्य बनाएको अनेरास्ववियु क्याम्पस कमिटीका अध्यक्ष अङ्कित खतिवडाले जानकारी दिए । चालीस दिनदेखि धर्ना दिएर आन्दोलन गर्दै आएको बताउँदै विद्यार्थीको समस्या समाधानका लागि विश्वविद्यालयको तर्फबाट कुनै पहल नभएपछि शुक्रबार डीनसहितको टोलीलाई तालाबन्दी गरेर राखेको उनको भनाइ छ ।
समस्या समाधानका लागि पहल चाल्ने प्रतिबद्धताका आधारमा मात्र ताला खोली दिने अनेरास्ववियु क्रान्तिकारीका अध्यक्ष दिपेन्द्र कोइरालाले बताएका । डीनसहितको मिलेमतोमा पैसाको चलखेलका आधारमा विद्यार्थीलाई भर्ना लिइएको उनको आरोप छ ।
प्रतिक्रिया दिनुहोस !
