कालिकोट : जिल्लाको रास्कोट नगरपालिकाले एक घर, एक मिटरसहितको धारा निर्माण गरेको छ । रास्कोट नगरपालिका र युनिसेफ नेपालको सहयोगमा नगरपालिकाको ६ बड्डालामा एक घर एक धारा निर्माण गरेको हो।
आर्थिक वर्ष २०७४/०७५ बाट नगरले सुरु गरेको एक घर एक धारा निर्माणको अभियान तीनवटा वडामा सम्पन्न गरेको रास्कोट नगरपालिा प्रमुख कासीचन्द्र बरालले बताए ।
उनका अनुसार दुई वर्षको अवधिमा रास्कोटको ९ मा १ सय ८० घरधुरी, ६ मा ८१ घरधुरी र २ मा ८० घरधुरीमा एक घर एक धारा निर्माण भइसकेको छन् ।
उनले भने, 'तीनवटा वडामा एक घर एक धारा निर्माण भइसकेका छन् । बाँकी वडामा पनि निर्माणको काम थालिएको छ । युनिसेफ र नगरपालिकाको झण्डै डेड करोड लगानीमा तीनवटा वडामा एक घर एक धारा निर्माण भएका छन् । चालु आर्थिक वर्षबाट नगरपालिका भित्रका सबै तहका विद्यालयमा पनि मिटरसहितका बालमैत्री धारा र शौचालय पनि निर्माण भइरहेका छन् ।
उनले रास्कोट नगरपालिकालाई अबको दुई वर्षभित्र हरेक घरमा मिटरसहितको धारा र हरेक टोल पूर्ण सरसफाई उन्मुख हुने दाबी गरे ।
रास्कोट नगरपालिकाको ९ का ६० घरधुरीमा नमुनाका रुपमा सुरुवात गरिएको एक घर एक धारा निकै प्रभावकारी भएको रास्कोट नगरपालिका ९ का अध्यक्ष एवं नगरको पूर्वाधार विकास समितिका संयोजक डबल बोगटीले बताए ।
उनका अनुसार एक घर एक धारा निर्माण अभियानमा कर्णाली प्रदेश सरकारले पनि सहयोग गरेको छ । प्रदेश सरकारबाट गत आर्थिक वर्षमा ३५ लाख बजेट खानेपानीमा बिनियोजन गरेको थियो । उनले भने, 'यहाँका नागरिकको पहिलो आवश्यकता सडक र खानेपानी अहिले घर घरमा पुगेको छ । रास्कोट नगरपालिका ९ निवासी स्थानीय धर्मराज ऐडीले घरमा बालमैत्री धारा जडान भएपछि खानेपानीको लागि खोलाको पानीको भर पर्नुपर्ने समस्या अन्त्य भएको बताए ।
उनले आफ्नै घरको आँगनमा खानेपानीको धारा भएपछि समयको बचत हुनुका साथै करेसा बारीमा सिंचाइ गर्न पनि सहज भएको बताए । सुन्दर रास्कोट र समूद्ध रास्कोट बनाउनका लागी शिक्षा, स्वास्थ्य, यातायात र खानेपानी क्षेत्रलाई नगरले पहिलो प्राथमिक्ता दिएको रास्कोट नगरपालिका ६ का अध्यक्ष एवं नगर प्रवक्ता टक्क फर्सालले बताए ।
उनले भने, 'बड्डालाको टोलमा प्रत्येक बर्षातमा खोलाको धमिलो पानी खानुपर्ने बाध्यताको अन्त्य भएको छ । खानेपानीको समस्या रहेका रस्कोटका ग्रामिण बस्तीमा एक घर एक धारा निर्माण भएपछि स्थानीयबासी खुसी भएका छन् ।
प्रतिक्रिया दिनुहोस !
