काठमाडौं : कैलाली गोदावरी–१० का रणबहादुर साउदलाई चार वर्षअघि ह्यारी लोगन नामबाट फेसबुकमा फ्रेन्ड रिक्वेस्ट आयो। विदेशी साथी बन्न खोजेपछि उनले एक्सेप्ट गरे। उनीहरूबीच २०७४ भदौदेखि इमेल र ह्वाट्सएपमार्फत पनि कुराकानी हुन थाल्यो।
गत भदौमा बिरामी पर्दा रणबहादुरलाई ह्यारीले ५० हजार रुपैयाँ उपचारार्थ भन्दै पठाइदिए। रणबहादुरले ह्यारीलाई दुःख पर्दाको साथी सम्झिए। यस्तो अवस्थामा ठगिनुपर्ला भन्ने त सायदै कसैले सोच्छ। तर, उनै बेलायती नागरिक ह्यारीले आफूसँग २० लाख रुपैयाँ ठगी गरेको रणबहादुरको भनाइ छ।
‘सेनेगलबाट सस्तो मूल्यमा महँगो कस्मेटिक सामान आउँदै छ। म लिएर आउँछु’, ह्यारीलाई उद्धृत गर्दै उनले भने, ‘दुवै मिलेर व्यापार गरौंला।’ उनले प्रस्ताव स्वीकार गरे।
ह्यारीले गत असोजमा भन्सार क्लियरेन्सका लागि १ हजार डलर पठाउन भने। रणबहादुरले सस्तोमा सामान पाउने आसमा ऋण खोजेर पठाए। भन्सार कटे पनि प्रहरीलाई घूस खुवाउनुपर्छ भन्दै फेरि २ हजार ४ सय डलर मागे। उनले ह्यारीले भनेअनुसार सजिलै पैसा पठाए। धेरै लागतको सामान भएकाले बैंक ग्यारेन्टीका लागि भन्दै फेरि रकम मागे। उनले फेरि बैंक क्लियरेन्सका लागि भनेर २ हजार ६ सय डलर पठाइदिए।
सामान भारतको दिल्ली आइपुग्यो भनेर गत मंसिरमा फोन आयो। रणबहादुर खुसी भए। ह्यारीले भन्सार कटाउन ३ लाख ७४ हजार भारु पठाउन लगाए। उनले परिवार र साथीसँग सल्लाह गरेर पैसा पठाए। अब प्रहरीलाई मिलाउनुपर्छ भन्दै ह्यारीले पुनः २ हजार ६ सय डलर मागे। उनले त्यो पनि पठाए।
भारतको पञ्जाब नेसनल बैंकस्थित फार्मिन हुसेनको खाता नम्बर ४०५२०००१००२०६९९८ मा ३ लाख ७४ हजार भारु, मोहम्मद खालिकको खाता नम्बर ६०६४०००१०००६५०७८ मा ३ लाख ३४ हजार भारु, जब्बरको खाता नम्बर ०६४७००१०१२३३९३२ मा २ हजार २ सय डलर र उही खातामा २ हजार ६ सय डलर पठाएको उनले सुनाए। उनले शिल्पा नामकी महिलाको नाममा भारतको इन्धुसिन्ध बैंकमा रहेको खाता नम्बर ९२७७१०७७८८५४ मा सुरुमा १ हजार डलर पठाएका थिए।
उनले पैसा पठाएको पठायै गरे। सामान कहिले आउँछ भनेर प्रश्न ह्यारीले मंसिरमा आउँछ भने। ह्यारीले गत मंसिरमा सामान लिन भारतको इन्दिरा गान्धी विमानस्थलमा बोलाए पनि। उनी खुसी हुँदै गाडी रिजर्भ गरेर साथीसँग पुगे। तीन घण्टा कुर्दा पनि ह्यारी नआएपछि मात्रै उनले आफू ठगीमा परेको थाहा पाए।
‘मलाई बिरामी हुँदा पनि सहयोग गरेको मान्छेले कसरी ठग्ला भनेर सोच्नै सकिनँ तर ठग रहेछ’, उनले अन्नपूर्णसँग भने, ‘महिनाको ६० हजार रुपैयाँ ब्याज तिर्नुपर्छ, म धेरै समस्यामा छु।’
उनी विदेश जाने चक्करमा थिए, ठगको फन्दामा परे। ‘मैले प्रहरीको केन्द्रीय अनुसन्धान ब्युरोमा निवेदन दिएको छु। उहाँहरूले हेर्छौं भन्नुभएको छ’, उनले भने, ‘त्यो ठगले अरूलाई पनि यसरी नै ठगेको हुन सक्छ।’ ब्युरोका प्रवक्ता एसपी बेलबहादुर पाण्डेले रणबहादुरले दिएको निवेदनअनुसार अनुसन्धान भइरहेको बताए।
प्रतिक्रिया दिनुहोस !
