काठमाडौं : नेपाल आइडल मात्र होइन, अमेरिकन आइडलसमेत यसपालि नेपालीका लागि विशेष हुने भएको छ । नेपाली युवक दिवेश पोखरेल अमेरिकन आइडलको १८ औं संस्करणका २० उत्कृष्टमा छानिएका छन् । संसारभरि नेपाली समुदायमा यसले खुसी ल्याइदिएको छ ।
छानिएका मात्र होइन, आइडलका निर्णायकहरू केटी पेरी, लियोनल रिची र लुक ब्रायनले दिवेशको गायनको उच्च तारिफ गरेका छन् । अडिसनकै क्रममा ब्रायनले भने, ‘मलाई लाग्छ कि, अमेरिकन आइडलमा हामीसँग अहिलेसम्म भएकामध्ये यो ठूलो तारा हुन सक्छ !’
दिवेशका लागि यो नै सबैभन्दा ठूलो ‘कम्प्लिमेन्ट’ थियो । त्यसपछि लियोनल रिची दिवेश उभिएकै ठाउँमा आएर अंकमाल गरे । केटी पेरीले भनिन्, ‘तिमी रकस्टार हौ ।’ अमेरिकन आइडलको अडिसनको उक्त भिडियो युट्युबमा लाखौंले हेरिसकेका छन् । जुन चौथो ‘ट्रेन्डिङ’ मा छ ।
अमेरिकाका मात्र होइन, विभिन्न देशका प्रतिभावान्बीच भिडन्त हुने सोमा दिवेशले अडिसन राउन्डबाटै ‘हलिउड पर्फमेन्स’ को अनुमति पाएका छन् । अडिसनको भिडियोमा देखिएअनुसार दिवेशले निर्णायक मण्डलसामु पहिला ‘गर्ल फ्रम नर्थ कन्ट्री’ बोलको गीत गाएका थिए । सीधा आँखा पारेर दोस्रो गीत गाउन निर्णायकले लगाए । त्यसपछि उनले ‘ह्याभ यु इभर सिन द रेन’ गीतका केही लाइन गाए । तीनै जना निर्णायक उनको गायनबाट मोहित भए । लियोनल भने रोकिन सकेनन् र अंकमाल गर्न पुगे ।
काठमाडौंमा जन्मिएका दिवेश अमेरिकन आइडलमा प्रवेश पाउने सम्भवतः पहिलो नेपाली हुन् । आइतबार एबीसी टेलिभिजनबाट प्रसारण भएको अमेरिकन आइडलको अडिसनसँगै दिवेशको परिचर्चा विश्वव्यापी भएको छ । स्टेजमा नमस्ते गर्दै छिरेका दिवेशले पास भएपछि पनि नमस्ते गरेर फर्किए । २० वर्षीय उनी ६ वर्षअघि अमेरिका पुगेका थिए ।
उनी ‘आर्थर गन’ को स्टेज नामबाट चिनिन्छन् । पछिल्ला वर्ष उनी गायन तथा गीत लेखनमा सक्रिय छन् । संगीतमय परिवारबाट नआए पनि उनी सानैदेखि गीतसंगीतमय माहोलमा हुर्किएको केही अमेरिकी अनलाइनले उल्लेख गरेका छन् । ६ वर्ष उमेरदेखि नै उनले गाउन थालेको अन्तर्वार्ताका क्रममा बताएका छन् । उनले बब डेलन, जोन मार्टिन, निक ड्रेक, बुक्का ह्वाइट, रोबर्ट जोन्सन, होलिन उल्फ, सोनी बोय, विलियम्स र जोन ली हुकरबाट गायनमा प्रभावित भएको प्रतिक्रिया दिए ।
दिवेश परिवारका साथ अमेरिकाको केन्सासमा बस्दै आएका छन् । उनी नेपालमा छँदादेखि नै गायनमा सक्रिय थिए । हरेक समय उनी गाइरहन्थे । त्यस बेला गायन उनको रुचिको विषय मात्रै थियो । जब उनी विचिता पुगे, अनि मात्रै गायनलाई गहन ठाने । विचितामा आइडलको प्रारम्भिक अडिसन लिइन्छ । अमेरिकन आइडलमा छिर्नुअघि उनले केही एल्बम रेकर्ड गरिसकेका छन् ।
‘कर्णाली’, ‘खोज’, ‘ग्रहण’, ‘म’ लगायत एल्बम दिवेशले आफ्नै युट्युब च्यानलबाट सार्वजनिक गरेका छन् ।
‘हेभी डटकम’ का अनुसार दिवेशले गत वर्ष नै अमेरिकन आइडलको अनलाइन अडिसन पेस गरेका थिए ।
सोही आधारमा उनी अडिसनमा बोलाइएका हुन् । ‘म अलिकति नर्भस छु, तर म मेरो संगीतमा सधैं विश्वस्त छु, र आफैंमा विश्वस्त छु,’ दिवेशले अडिसनका क्रममा भनेका थिए ।
उनको आफ्नै युट्युब च्यानलमा दसौं हजार भ्युज छ । जुन बढ्ने क्रममा देखिन्छ । अडिसनमा उनले नेपालको सुन्दरताको पनि वर्णन गरेका थिए । आइडलको अडिसनअघि प्रसारित साढे ६ मिनेटको भिडियो क्लिपमा दिवेशको नेपालमै खिचिएको भिडियोसमेत समावेश छ ।
प्रतिक्रिया दिनुहोस !
