स्याङ्जा : स्याङ्जामा निर्मित कालीगण्डकी ए जलविद्युत् केन्द्रको जलाशय ड्याम मर्मतका लागि खोलिने भएको छ। मर्मतका लागि ४ दिनसम्म ड्याम खोलिने भएको हो। नेपाल विद्युत् प्राधिकरण, बेल्टारी शाखाले सूचना प्रकाशित गरी बिहीबार राति ९ बजेदेखि ड्याम खोल्ने जनाएको छ।
ड्याम खोलिने भएपछि प्राधिकरणले ड्यामदेखि पावर हाउससम्मका क्षेत्रमा बस्ने स्थानीयबासीलाई सचेत गराएको छ। स्याङ्जा, पाल्पा र गुल्मी जिल्ला जलविद्युत् केन्द्रका प्रभावित जिल्ला हुन्।
विद्युत् उत्पादन केन्द्र प्रभावित क्षेत्रमा पर्ने स्याङ्जाको कालीगण्डकी गाउँपालिका, पाल्पाका तानसेन नगरपालिका र बगनासकाली गाउँपालिका तथा गुल्मीका कालीण्डकी गाउँपालिका, सत्यवती गाउँपालिका र रुरु गाउँपालिकालाई पत्रमार्फत सूचित गराएको प्रशासकीय अधिकृत प्रदीपकुमार भुवाजीले जानकारी दिए।
कालीगण्डकी ए १ सय ४४ मेगावाट विद्युत् उत्पादन गर्दै आएको छ। तीन वटा ४८÷४८ मेगावाटका टर्बाइनमार्फत स्याङ्जाको कालीगण्डकी गाउँपालिकाअन्तर्गत साविक श्रीकृष्णगण्डकीमा २०५६ सालमा कालीगण्डकी ए जलविद्युत् केन्द्र निर्माण सुरु गरी २०६१ मा विद्युत् उत्पादन कार्यको उद्घाटन गरिएको हो।
प्रतिक्रिया दिनुहोस !
