जोमसोम : राष्ट्रिय गौरवको आयोजना अन्तर्गत बेनी-जोमसोम ७६ किलोमिटर सडक खन्नका लागि प्रयोग भएको एक स्काभेटर सोमबार साझ ५ बजे कालिगण्डकी नदीमा खसेको छ। मुस्ताङको थासाङ गाउँपालिका-४ घासा डाडोमाथि भीर कटिङ गर्दै गरेको अवस्थामा अकस्मात माथिबाट सुख्खा पहिरो खसेपछि स्काभेटर कालिगण्डकी नदीमा खसेको मुस्ताङका सहायक प्रजिअ घनश्याम गौतमले जानकारी दिए।
सुख्खा पहिरोले करिव ३ सय मिटर तल कालिगण्डकी नदीमा स्काभेटर खसेको सहायक प्रजिअ गौतमले जानकारी दिए। उनका अनुसार स्काभेटर दुर्घटनामा उक्त स्काभेटरका अपरेटर सिन्धुपाल्चोक जिल्ला घर भएका ५० वर्षीय अर्जुन दाहालको मृत्यु भएको छ। यस्तै ,स्काभेटर समेत नदीमा खस्दा पूर्ण रुपमा क्षति भएको छ।
यस्तै बेनी÷जोमसोम सडक विस्तारका लागि लगाइएको टाईम कार्ड खुल्ला गर्ने पर्खाइमा बसेको ना ६ ख ४०८१ नम्बरको यात्रुबाहक बसमा समेत सुख्खा पहिरोले क्षति पुर्याएको घासा प्रहरी चौकीका इञ्चार्ज नीमप्रसाद तिमिल्सिनाले जानकारी दिए। उनका अनुसार बसभित्र रहेका करिब १९ यात्रु मध्ये १ जना सामान्य घाइते भएका छन्।
उक्त क्षेत्रमा भिर कटिङ गरेर सडकको ग्रेड डाउन गर्ने तथा सडक चौडा गर्ने क्रममा सुख्खा पहिरो गएको थासाङ -४ का स्थानीय जनप्रतिनिधि विशाल शेरचनले जानकारी दिए। उनका अनुसार सुख्खा पहिरोले पुरै सडक पुरिएकाले बेनी-जोमसोम सडक अवरुद्ध भएको हो। बेनी-जोमसोम खण्ड अन्तर्गत म्याग्दी तातोपानीदेखि मुस्ताङको कोवाङसम्मको सडक स्तरोन्नतिको जिम्मा शर्मा गजुरमुखीले लिएको थियो। मुस्ताङका निमित्त प्रहरी प्रमुख बिनोद सुवेदीका अनुसार सुख्खा पहिरोले सडक भासिएकाले सडक खुल्न केही दिन लाग्नेछ। सरकारले उत्तरी कोरलानाका जोड्ने लक्ष्यसहित २०७४ सालदेखि सडक विस्तारको काम हुदै आएको छ।
प्रतिक्रिया दिनुहोस !
