लन्डन : बेलायतमा आगामी मे २४ देखि २६ सम्म हुने भनिएको किरात राईको तेस्रो अन्तर्राष्ट्रिय सम्मेलन अन्योलमा परेको छ । सम्मेलन आयोजक किरात राई यायोक्खा बेलायतको विवाद चर्किएपछि त्यसको असर सम्मेलनमा पर्ने भएको हो ।
कार्यवाहक अध्यक्ष चन्द्रबहादुर राई पक्षले शनिबार पत्रकार सम्मेलन गरी संस्था संकटमा परेको भन्दै सम्मेलन औचित्यहीन रहेको जनाएको छ । सम्मेलनको तयारी गरिरहेकी संस्थाकी अध्यक्ष कल्पना राई अल्पमतमा रहेको तथा उनलाई बहुमतले निलम्बन गरिएको उनीहरूको दाबी छ ।
संस्थाको हितविपरीत निर्णय गर्दै गएको, बहुमत कार्यसमितिको अनुमोदनलाई नटेरेको, मनपरी ढंगले पदाधिकारी मनोनयन गरेकोजस्ता कारणले अध्यक्षलाई निलम्बन गरिएको उनीहरूले जनाएका छन् । विवादबीच बलजफ्ती सम्मेलन गर्न लागिएको तथा आन्तरिक झगडाबारे किरात राई यायोक्खा केन्द्र नेपाललाई अवगत गराउँदा पनि बेवास्ता गरिएकोे उनीहरूको गुनासो छ । संस्थाको विवाद मिलाएर मात्र सम्मेलन गर्नुपर्ने माग उनीहरूले राखेका छन् ।
अध्यक्ष राई नेतृत्वको समूहले यसअघि भारतको सिक्कमका पूर्वमुख्यमन्त्री पवन चाम्लिङको उपस्थितिमा विभिन्न देशबाट १ सयभन्दा बढी प्रतिनिधिको सहभागितामा बेलायतमा सम्मेलन गर्ने घोषणा गरेको थियो ।
प्रतिक्रिया दिनुहोस !
