सिमरा : कोरोना भाइरसविरुद्ध सावधानी अपनाउदै बाराको सिमरा विमानस्थलमा बुद्ध एयरले यात्रुको स्वास्थ्य परीक्षण र सहायता कक्ष सुरु गरेको छ ।
महामारीको रुपमा विश्वभर फैलिरहेको कोरोना भाइरस (कोभिड–१९)को संक्रमण फैलन नदिन बुद्ध एयरले स्वास्थ्य परीक्षण गरेर मात्र यात्रुलाई विमानमा पठाउन थालेको हो ।
बोर्डिङ पास लिनुपूर्व थर्म स्क्यानरमार्फत यात्रुको तापक्रम जाँच गर्ने र त्यसपछि मात्रै विमानमा पठाउन थालिएको बुद्ध एयर सिमराका प्रमुख सुरेश रेग्मीले बताए ।
‘कोरोनाको संक्रमण फैलन नदिन हामीले सचेतना अपनाएका हौँ, अहिलेको स्थितिमा सबैले यस्तो कार्य गर्न जरुरी छ’, रेग्मीले भने ।
सिमरा–काठमाडौं रुटमा बुद्ध एयरका दैनिक सात उडान छन् । नेपाल मात्र नभई छिमेकी राष्ट्र भारतका यात्रुसमेत यो रुट भएर काठमाडौं–सिमरा आवतजावत गर्ने गरेका छन् ।
भारतमासमेत कोरोनाको संक्रमण देखिसकिएको छ ।
यसैगरी जीतपुरसिमरा उपमहानगरपालिकाको सहकार्यमा सिमरा विमानस्थलमा यात्रु सहायता कक्ष सुरु गरिएको छ । यात्रुलाई कोरोनाविरुद्धको सावधानीका विषयमा जानकारी गराउन, यात्रुको स्वास्थ्य अवस्थाका विषयमा बुझ्न सहायता कक्ष सुरु गरिएको हो ।
सहायता कक्षमा यात्रुलाई कोरोनाको संक्रमणबाट बच्ने उपायका विषयमा जानकारी गराउने र अन्यलाई समेत बचाउन लागि आफूले खेल्नुपर्ने भूमिकाका विषयमा बताउने गरिएको जीतपुरसिमरा उपमहानगरपालिकाका स्वास्थ्य कर्मचारी अनिलकुमार दासले जानकारी दिए ।
प्रतिक्रिया दिनुहोस !
