बैतडी : जिल्ला अस्पताल बैतडीमा ३ बेडको आइसोलेसन कक्ष स्थापना गरिएको छ । कोरोनाको विश्वव्यापी संक्रमण बढिरहेका बेला शंकास्पद लक्षण भएका बिरामीका लागि आइसोलेसन कक्ष स्थापना गरिएको हो ।
अस्पतालभित्रै स्थापना गरिएको आइसोलेसन कक्षमा शंकास्पद बिरामीको उपचार गर्ने, बिरामीको खकार र सिंगानको नमूना संकलन गरेर केन्द्रमा पठाउने व्यवस्था मिलाइएको जिल्ला अस्पतालका मेडिकल सुपरीटेन्डेन्ट डाक्टर वसन्तराज जोशीले जानकारी दिए ।
'हामीले सोमबार मात्रै जिल्ला अस्पतालभित्रै आइसोलेसन कक्ष स्थापना गरेका छौं । शंकास्पद बिरामी भेटिएको सोही कक्षमा राखेर उपचार गर्छौं,'उनले भने, 'कोरोनाको विश्वव्यापी संक्रमणलाई मध्यनजर गरेर हामीले पनि स्थानीयस्तरमा पूर्वतयारी स्वरुप आइसोलेसन कक्षको स्थापना गरेका हौं । शंकास्पद बिरामीलाई स्वास्थ्यकर्मीको निगरानी सोही कक्षमा राखेर उपचार गर्छौं ।'
शंकास्पद बिरामीको खकार र सिँगानको नमूना पठाउने माध्यम पनि प्रदेश जनस्वास्थ्य प्रयोगशालाबाट मगाइसकिएको डाक्टर जोशीले बताए । कोरानाबाट बच्न पूर्व तयारी आवश्यक रहेकाले सोही अनुसार आइसोलेसन कक्ष स्थापना गरिएको उनको भनाइ छ ।
यसअघि प्रदेश सरकारले सबै जिल्ला अस्पतालहरुमा आइसोलेसन कक्ष स्थापना गर्न निर्देशन दिएको थियो । बैतडी भारतसँग सीमा जोडिएको जिल्ला भएकाले पनि उच्च सतर्कता अपनाइएको डा. जोशीले बताए ।
सीमासँग सीमा जोडिएको नाका झुलाघाटमा केही दिन अघिदेखि स्वास्थ्य सहायता कक्ष स्थापना गरेर त्यहाँबाट नेपाल भित्रिने नागरिकको स्वास्थ्य परीक्षण नियमित रुपमा भइरहेको दशरथचन्द नगरपालिकाले जनाएको छ । नगरपालिका, स्वास्थ्य कार्यालय र जिल्ला अस्पतालको संयुक्त सहकार्यमा सीमा नाकामा स्वास्थ्य सहायता कक्ष सञ्चालनमा ल्याइएको दशरथचन्द नगरपालिकाका स्वास्थ्य शाखा प्रमुख दुर्गादत्त जोशीले बताए । 'हामीले सीमा नाकाको स्वास्थ्य सहायता कक्षलाई प्रभावकारी बनाउन नाका खुलेदेखि बन्द हुँदा नेपाल फर्किने नागरिकको स्वास्थ्य परीक्षण गर्ने व्यवस्था मिलाएका छौं । भारतबाट फर्किने हरेक नागरिकको स्वास्थ्य सहायता कक्षमा चेकजाँच भइरहेको छ।'
झुलाघाटमा सञ्चालन भएको स्वास्थ्य सहायता कक्षमा इन्फ्रारेड थर्मामिटरको सहयोगले नेपाल भित्रिने नागरिकमा ज्वरो छ कि छैन भनेर चेकजाँच गर्ने गरिएको स्वास्थ्य कार्यालयका प्रमुख योगेशप्रसाद भट्टले बताए ।
सीमा नाका झुलाघाटमा सञ्चालनमा ल्याइएको स्वास्थ्य सहायता कक्षबाट अहिले ४५० बढी नागरिकको स्वास्थ्य परीक्षण गरिसकिएको नगरपालिकाका स्वास्थ्य शाखा प्रमुख दुर्गादत्त जोशीले बताए । अहिलेसम्म कसैमा कोरोनाको संक्रमण नपाएको उनले बताए ।
घाटमा जोखिम बढी
भारतसँग सीमा जोडिएको बैतडीको झुलाघाट नाकामा कोरोना भाइरसको चेकजाँचका लागि सहायता कक्ष स्थापना गरिएको भएपनि जिल्लाका अन्य खुला घाटमा भने सहायता कक्ष सञ्चालन गरिएको छैन् । जिल्लाको तल्लोसोराड क्षेत्रमा ९ घाटबाट आवतजावत गर्ने गरिए पनि स्वास्थ्य सहायता कक्ष सञ्चालनमा आउन सकेका छैनन् ।
जिल्लाको मेलौली नगरपालिका, शिवनाथ गाउँपालिका र पञ्चेश्वर गाउँपालिकाका अधिकांश नागरिकले विभिन्न घाटबाट भारत आवतजावत गर्ने भएपनि सर्तकता भने अपनाइएको छैन् ।
महाकाली नदी किनारका घाटमा कोरोना चेकजाँचका लागि सहायता कक्षहरु सञ्चालन नगर्दा जोखिम बढ्दै गएको स्वास्थ्य कार्यालयका प्रमुख योगेशप्रसाद भट्टले जानकारी दिए ।उनले उपकरण, बजेट र स्वास्थ्यकर्मीको अभावमा तल्लोसोराडका नाकामा स्वास्थ्य सहायता कक्ष स्थापना गर्न नसकिएको बताए।
महाकाली नदीसँग जोडिएका एकदर्जन बढी घाटबाट दैनिकरुपमा आवतजावत गर्ने गरिएको स्थानीय महामलसिंह साउँदले बताए । खास गरेर शिवनाथ र पञ्चेश्वर गाउँपालिकाका मानिस दैनिक उपभोग्य सामग्रीदेखि लिएर उपचारका लागि समेत डुंगामार्फत भारत आवतजावत गर्ने गरेका छन् । तर ती घाटमा स्वास्थ्य चेकजाँचको कुनै व्यवस्था गरिएको छैन्
भारतसँग जोडिएका घाटमा स्वास्थ्य सहायता कक्ष स्थापनाका लागि तत्काल केही गर्न नसकिएको शिवनाथ गाउँपालिकाका अध्यक्ष कर्णसिंह साउँदले बताए । उनले भने, 'यो विषयमा छलफल गर्न बाँकी नै छ । सीमा नाकामा स्वास्थ्य सहायता कक्ष स्थापनाबारे गरिनेछ।'
पञ्चेश्वर गाउँपालिकाले पनि महाकाली नदीका घाटमा स्वास्थ्य सहायता कक्ष स्थापना गर्न नसकेको जनाएको छ । घाटमा स्वास्थ्य सहायता कक्ष स्थापना गर्ने समान्य कुराकानी भएपनि थप छलफल हुन भने बाँकी रहेको गाउँपालिका उपाध्यक्ष बीना भट्टले बताइन् ।
शिवनाथ गाउँपालिकासँग जोडिएका ३ र पञ्चेश्वर गाउँपालिकासँग जोडिएका ६ वटा घाटमा सहायता कक्ष स्थापनाका लागि सम्बन्धित स्थानीय तहलाई आग्रह गरिएको प्रमुख जिल्ला अधिकारी आनन्द पौडेलले बताए ।
प्रतिक्रिया दिनुहोस !
