मलंगवा : कञ्चनजंघा फुटबल क्लब सिक्किम सर्लाहीको बागमतीमा जारी चौथो राजर्षि जनक कप फुटबल प्रतियोगिताको सेमिफाइनलमा पुगेको छ । सिक्किम मंगलबार भएको दोस्रो क्वार्टरफाइनल खेलमा आयोजक बागमती नगरपालिका फुटबल क्लबलाई १—० गोलले हराउँदै प्रतियोगिताको अन्तिम चारमा प्रवेश गरेको हो ।
तीन राष्ट्रिय खेलाडी र दुई विदेशी खेलाडीसहित मैदानमा ओर्लिएको आयोजक बागमती नगरपालिकाले खेलभर विपक्षीलाई गतिलो चुनौती दिए पनि जवाफी गोल भने फर्काउन सकेन । सिक्किमका लागि खेलको १८औं मिनेटमै करण थापाले निर्णायक गोल गरेका थिए । पहिलो हाफमा सिक्किमले खेललाई आफ्नो नियन्त्रणमा राखेको थियो ।
खेलाडीबीच गतिलो तालमेल नमिल्दा बागमतीले पहिलो हाफमा सोचेजस्तो प्रदर्शन गर्न सकेन । विदेशी खेलाडी पिटर सेगुनले रक्षापंक्तिमा उत्कृष्ट प्रदर्शन गरेका कारण आयोजक टोली थप गोल खानबाट जोगिएको थियो । खेलको २१औं मिनेटमा सिक्किमका सुब्रोतो सोरेनले बागमतीका योगेश
गुरुङलाई डीबक्स नजिकै लडाउँदा बागमतीले गोल फर्काउने गतिलो अवसर पाएको थियो । तर, विमल घर्तीमगरले प्रहार गरेको बल गोलभन्दा केही माथिबाट बाहिर हुइँकिएको थियो ।
यसैगरी २७औं मिनेटमा सुनील बलले गोलपोस्ट नजिकै पाएको बललाई गोलमा परिणत गर्न नसक्दा बागमतीको अर्को अवसर खेर गएको थियो । दोस्रो हाफमा भने बागमतीले सिक्किमलाई दबाबमा राखेको थियो । पहिलो हाफमै गोल गरेका कारण सिक्किम दोस्रो हाफमा रक्षात्मक नीतिसहित मैदानमा ओर्लिएको थियो ।
दोस्रो हाफमा बागमतीका खेलाडीले करिब आधा दर्जन सशक्त प्रहार गरे पनि सिक्किमका गोलरक्षकले उत्कृष्ट बचाउ गरेका थिए । बागमतीबाट राष्ट्रिय टोलीका विमल घर्तीमगर, सुनील बल र बुद्ध चेम्जोङले पनि खेलेका थिए । राम्रो खेल देखाएका सिक्किमका गोलरक्षक निगम सिंह म्यान अफ दी म्याच घोषित भए । सिंहले १० हजार रुपैयाँ र एक जोर बुट पुरस्कार पाए । बुधबार तेस्रो क्वार्टरफाइनल खेल ब्वाइज युनियन क्लब काठमाडौं र नेपाल पुलिस क्लबबीच खेलिनेछ । बागमती र सिक्किम बाई पाएर सीधै क्वार्टरफाइनलमा पुगेका थिए ।
प्रतिक्रिया दिनुहोस !
