डोल्पा : चैत्र महिनाको आगमनसँगै डोल्पालगायत हिमाली जिल्लामा भारी हिमपात भएको छ । निरन्तर तीन दिनदेखि परेको वर्षापछि २ हजार मिटरभन्दा माथिका सबै क्षेत्रमा हिउँ जमेको छ ।
मंसिरदेखि हिउँ परेपनि जम्न नसकेको डोल्पामा भने यसपटक चैत्रमा हिउँ जमेर सेताम्मे भएको छ । चैत्रमा परेको हिउँबाट सबैभन्दा बढी माथिल्लो डोल्पा प्रभावित भएको छ ।
माथिल्लो डोल्पामा २ फिट भन्दा बढी हिउँ जमेको आँकलन गरिएको छ । माथिल्लो डोल्पाका शे-फोक्सुण्डो गाउँपालिका,डोल्पोबुद्ध गाउँपालिका र छर्काताङसोङ गाउँपालिकामा भारी हिमपात भएपछि उतै थुनिएका छन्।
करिब ५६ सय मिटर उचाइका ठाउँमा हिउँले ढाकेपछि आवतजावत बन्द भएको स्थानीय धावाक्याल्जेन लामाले बताए । उनले चैत्रमा आएको हिउँ पहिरोले चौरी बगाउँछ कि भन्ने चिन्ता लागेको बताए।
तल्लो डोल्पाका कृषक भने खेतीपातीको मुखैमा हिउँ परेपछि खुसी भएका छन्। 
हिउँ र पानी परेपछि खेतीपाती गर्न सहज हुने भन्दै तल्लो डोल्पाका सबै कृषक खुसी भएको स्थानीय नन्दबहादुर लामाले जानकारी दिए । माटो खुकुलो हुने र खेती छिटै उम्रिने भन्दै कृषक खुसी भएको बताए ।
हिमपातले डोल्पाको जनजीवन प्रभावित भएको छ । निरन्तरको हिमपात र पानीले तीन दिनदेखि जुफाल बिमानस्थलमा हवाइ उडान हुन सकेको छैन ।
हवाइ उडान नभएपछि जुफाल बिमानस्थलमा यात्रु अलपत्र परेका छन् । मौसममा सुधार आउन अझै केहि दिन लाग्ने संकेत देखिएपछि यात्रुहरु पैदलमार्ग प्रयोग गर्न थालेको जुफाल बिमानस्थल कार्यालयले जानकारी दिएको छ ।
हिमपात र वर्षाले चिसो ह्वात्तै बढेपछि बालबालिका र वृद्धवृद्धालाई न्यानोगरी बस्न चिकित्सकले आग्रह गरेका छन्। चैत्रमा परेको हिउँ खेल्न मानिस निकै तछाडमछाड गरेको देख्न पाइन्छ ।
प्रतिक्रिया दिनुहोस !
