महेन्द्रनगर : कञ्चनपुरको शुक्लाफाँटा नगरपालिका-११ कलुवापुरमा भएको भण्डारी दम्पत्ती हत्या प्रकरणमा संलग्न छोरालाई कञ्चनपुर प्रहरीले सोमबार सार्वजनिक गरेको छ। गत फागुन १५ गते घरभित्र मृत भेटिएका जयलाल भण्डारी र उनकी श्रीमती धनाको हत्यामा संलग्न २६ वर्षीय छोरा भरत भण्डारीलाई प्रहरीले डडेल्धुराबाट पक्राउ गरेको हो ।
प्रहरीका अनुसार भण्डारीले बुवा र कान्छी आमाको धारिलो हतियार प्रहार गरी हत्या गरेको अनुसन्धानबाट खुलेको छ डडेल्धुराबाट १३ गते मोटरसाइकलको ट्रायल दिन महेन्द्रनगर पुगेका भण्डारीले डडेल्धुरास्थित घर फर्किनका लागि हिडेका थिए।
तर, कैलालीको गोदावरी पुगेर उनी मादक पर्दाथ सेवन गरी कलुवार फर्किएका थिए । सोही राती कान्छी आमासँग विवाद भएपछि हत्या भएको प्रहरीले जनाएको छ।
'पारिवारीक लेनदेन र बावुले कान्छी आमा ल्याएको कारण हत्या भएको खुलेको छ,'कञ्चनपुरका प्रहरी प्रमुख उपरीक्षक मुकुन्द मरासीनीले भने, 'कान्छी आमाको भान्साकोठामा र बुवाको सुतेको अवस्थामा हत्या गरेर राती नै डडेल्धुरा फर्केको प्रारम्भिक अनुसन्धानबाट खुलेको छ ।'
मध्य रातमा हत्या गरी फर्केका भण्डारीले रगताम्य लुगा र हत्यामा प्रयोग भएको हतियार भासुभीरमा फोलेको प्रारम्भिक बयान दिएको प्रहरीले जनाएको छ।
प्रतिक्रिया दिनुहोस !
