काभ्रे : पनौती बसपार्कमा टिपरको ठक्करबाट आमा–छोरीको मृत्यु भएको छ ।
दिउँसो ४ बजे बनेपाबाट पनौतीतर्फ जाँदै गरेको बा ५ ख ५४८० नम्बरको खाली टिपरले ठक्कर दिँदा ३३ वर्षीया जुनीमाया गोले र उनकी ३ वर्षीया छोरी स्मारिका गोलेको मृत्यु भएको हो ।
टिपरको ठक्करपछि बनेपामा रहेको शिरमेमोरियल अस्पतालमा उपचारको क्रममा उनीहरुको मृत्यु भएको प्रहरीले जनाएको छ ।
इलाका प्रहरी कार्यालय बनेपाका अनुसार उनीहरु खानीखोला गाउँपालिका १ मा बस्दैआएका थिए । घटनापछि टिपर र टिपर चालक रोशी गाउँ पालिका ६ घर भएका नवराज थापालाई प्रहरीले नियन्त्रणमा लिएर थप अनुसन्धान गरिरहेको जनाएको छ ।
साथै पनौतीमा स्थानीयहरुले घटनाको बिरोध गर्दै नाराबजी गरेर सडक अवरुद्ध गरेका छन् । चालकलाई कारवाही गर्नुपर्ने भन्दै स्थानीयले प्रदर्शन गरेका हुन् । प्रदर्शन दबाउन प्रहरीले १९ राउण्ड टियर ग्यास समेत प्रहार गरेको छ । साँझ अवेरसम्म पनि प्रहरी र स्थानीयबीच झडप भएको थियो ।
प्रतिक्रिया दिनुहोस !
