काठमाडौं : कोरोना भाइरस संक्रमण भए–नभएको जाँच एवं घाँटीको र्याल (थ्रोट स्वाव) संकलन गर्दा स्वास्थ्यकर्मीले लगाउने व्यक्तिगत सुरक्षा कवच (पर्सनल प्रोटेक्टिभ इक्युपमेन्ट) सकिन लागेको छ । दुई महिनायता एक हजार भन्दा बढी पीपीई सेट प्रयोगमा आइसकेको छ । पीपीईमा स्वास्थ्यकर्मी एवं अन्य सहयोगीले लगाउने विशेष खालको सुरक्षित सामग्री (गाउन, हेल्मेट, इमर्जेन्सी आइवास, चश्मा, मास्क, पञ्जा, बुट)लगायतका सामग्री हुन्छन् । पीपीई पुनः प्रयोग गर्न नमिल्ने स्वास्थ्य सेवा विभाग, व्यवस्थापन महाशाखा निर्देशक भोगेन्द्रराज डोटेलले जानकारी दिए ।
चीनको उहानबाट उद्धार गरिएका १ सय ७५ नेपाली र आइसोलेनमा राखेर उपचार गराइएका स्वदेशी एवं विदेशीको घाँटीको र्याल (थ्रोट स्वाव) संकलन र स्वास्थ्य जाँचका क्रममा पीपीई प्रयोग गरिएको थियो । त्यस्तै, एम्बुलेन्स चालक, फोहोरमैला व्यवस्थापन गर्ने व्यक्तिले पनि पीपीई प्रयोग गरेको स्वास्थ्य सेवा विभागले जनाएको छ । कामका क्रममा हुने स्वास्थ्य खतरा (अकुपेसनल हाजार्ड) बाट जोगिन स्वास्थ्यकर्मीले पीपीई पहिरिनु पर्ने डब्लुएचओको मापदण्ड छ ।
टेकुस्थित शुक्रराज ट्रपिकल तथा सरुवा रोग अस्पतालमा हालसम्म ४ सय ६४ जनाको स्वाव परीक्षण गरिएको छ । ४८ जनालाई आइसोलेसन कक्षमा राखेर डिस्चार्ज गरिएको अस्पतालका प्रमुख कन्सल्ट्याण्ट डा.अनुप बास्तोलाले जानकारी दिए । उनले भने, ‘कोरोना भाइरससँग मिल्दोजुल्दो लक्षण देखिए आइसोलेसनमा राखेर निगरानी गर्नुपर्ने हुन्छ । आइसोलेसनमा बसेका बेला स्वास्थ्यकर्मीलाई पीपीई आवश्यकता पर्छ ।’
शुक्रराज अस्पताल स्वास्थ्य परीक्षण गराएका मध्ये एक जनामा भाइरस पोजेटिभ देखिएको थियो । पोजेटिभ देखिएका ती व्यक्ति अहिले स्वस्थ रहेको स्वास्थ्य सेवा विभागका महानिर्देशक महेन्द्रप्रसाद श्रेष्ठले जानकारी दिए । सरकारले खरिद गरेको ६ सय पीपीई सेट सकिएपछि गत साता डब्लुएचओले एक हजार सेट उपलब्ध गराएको थियो । तीमध्ये पनि अहिले ९ सय मात्र बाँकी छ । ३३ हजार सेट खरिद गरिँदै
स्वास्थ्य सेवा विभागले संभावित जोखिमलाई मध्यनजर गर्दै थप सेट खरिद प्रक्रिया अघि बढाएको छ । अहिले भण्डारमा ९ सय सेट सञ्चित छ । विश्व स्वास्थ्य संगठन (डब्लुएचओ) ले नेपालमा आवश्यक पीपीई खरिद गर्न मापदण्ड तोकिसकेको छ । सोही मापदण्ड अनुसारको पीपीई खरिद प्रक्रिया अघि बढाइएको व्यवस्थापन महाशाखा निर्देशक डोटेलले जानकारी दिए । पीपीई खरिदका लागि चैत ७ गते टेण्डर खोल्न लागेको जनाएको छ । व्यवस्थापन महाशाखाका प्रमुुख डोटेलले भने, ‘३३ हजार सेट खरिद प्रक्रिया बढाइएको छ ।’ यी सेट खरिदका लागि २८ करोड बजेट विनियोजन गरिएको छ । कोरोना भाइरस संक्रमणको मिल्दोजुल्दो लक्षण देखिए वा क्वारेन्टाइनमा बसेका व्यक्तिको संख्या बढेमा पीपीईको अपुग हुने देखिएको छ । ०००
प्रतिक्रिया दिनुहोस !
