अर्घाखाँचीमा एसईई परीक्षाको तयारी पूरा, ३ हजार ६ सय ८ जना परीक्षार्थी सहभागी

सन्धिखर्क : चैत ६ गतेदेखि सुरु हुने एसईई परीक्षाको तयारी पूरा भएको छ । बिहान ८ बजेदेखि सुरु हुने माध्यमिक शिक्षा परीक्षा एसईईमा अर्घाखाँची जिल्लाबाट ३ हजार ६ सय ८ जना परीक्षार्थी सहभागी हुने शिक्षा विकास तथा समन्वय इकाइ अर्घाखाँचीका प्रमुख मनिराम पराजुलीले जानकारी दिए । 

त्यस्तै ग्रेडवृद्धीतर्फ १ मात्र परीक्षा केन्द्र सन्धिखर्कमा निर्धारण गरिएको छ । जसमा ४३ जना छात्र र ५४ जना छात्रा गरी जम्मा ९७ जना परीक्षार्थी परीक्षामा सहभागी हुनेछन् । यस्तै, प्राविधिक विषयतर्फ ६५ परीक्षार्थीले एसईई परीक्षा दिँदैछन् । हरिहर मावि पोखराथोक, सरस्वती मावि भगवती र जनता मावि पकलेमा प्राविधिक तर्फका विद्यार्थी रहेको शिक्षा विकास तथा समन्वय इकाइ अर्घाखाँचीले जनाएको छ ।

यस वर्ष १७ जना विद्यार्थी एसईई परीक्षा दिनबाट बन्चित भएका छन्। ७५ प्रतिशत हाजिरी नपुगेका कारणले १७ जना विद्यार्थी परीक्षा दिनबाट बन्चित भएका हुन् । परीक्षाका लागि १७ केन्द्राध्यक्ष १९ सहायक केन्द्राध्यक्ष, १७१ निरीक्षक, ३४ जना सहायक कर्मचारी, ६८ जना विद्यालय सहयोगी र २५५ जना सुरक्षाकर्मी खटिने छन् । 

सबै परीक्षाकेन्द्रमा उत्तरपुस्तिका पनि पुगिसेकेका र सुरक्षाकर्मी पनि परिचालन गरिसकिएको पराजुलीले जानकारी दिए  । परीक्षा केन्द्रमा कोरोना रोकथामका लागि हेल्थ डेस्क स्थापनाको तयारी पनि भइरहेको छ।निर्वाद र निर्भय भएर जाँच दिन परीक्षार्थीलाई शिक्षा विकास तथा समन्वय इकाइले आग्रह गरेको छ ।