जिल्ला अस्पतालमा आइसोलेसन कक्ष, चार ठाउँमा हेल्थ डेक्स
चैत ६, २०७६ बिहीबार १३:२५:०
बाजुरा : विश्व व्यापारिक रुपमा फैलिएको कोरोना बाइरस (कोभिड १९) फैलिन नदिन जिल्ला प्रशासन कार्यालय बाजुराले सर्तकता अपनाउन सबै स्थानीय तहलाई पत्राचार गरेको छ ।
जिल्ला अस्पताल बाजुरामा आइसोलेसन कक्षको स्थापना गरेको छ । तीन शैयाको आइसोलेसन कक्ष स्थापना गरी आवश्यक औषधि जनशक्तिको प्रबन्ध गरिएको जिल्ला अस्पताल बाजुराका प्रमुख डाक्टर रुपचन्द्र विश्वकर्माले जानकारी दिएको छ । अग्रीम तयारीको रुपमा तीन शैयाको आइसोलेसन स्थापना गरिएको भएपनि आवश्यकताको आधारमा शैया थप्न सक्ने तयारी गरेको विश्वकर्माले बताए ।
जिल्ला अस्पतालमा आइसोलेसन स्थापना गरिएसँगै जिल्लाका नौ वटा स्थानीय तहका स्वास्थ्य संस्थामा कार्यरत कर्मचारीलाई कोरोना भाइरससम्बन्धी जनचेत्तना र रोकथामको कारेमा प्रचारप्रसार गर्न निर्देशन गरिएको डाक्टर विश्वकर्माले बताए ।
कोरोनाबारे जानकारी दिन महिला स्वास्थ्य स्वयम सेविका स्वास्थ्यकर्मीलमार्फत सबै स्थानीय तहमा जनचेतना फैलाउन निर्देशन दिएको उनले बताए । त्यसै बाजुरा जिल्लामा आगमन हुने चारवटा नाकामा हेल्थ डेक्स स्थापना गर्ने निर्णय गरिएको छ । हेल्थ डेक्स रहने नाकामा साफे मार्तडी सडकमा पर्ने अछाम जिल्लासँग जोडिएको डाब बजार, सदरमुकाम मार्तडी बस पार्क,कोल्टि बिमानस्थल र कालिकोट जिल्लाको नाका जुड्डीमा स्थापना गरिने भएका छन्।
बुधबार जिल्ला दैविक प्रकोप उद्दार समितिको बैठक बसी कोराना भाइरस रोग लाग्न नदिन यसबारे सचेतना जगाउन सबै सरोकारवालालाई आग्रह गरेको छ । बैठकबाटै हेल्थ डेक्स स्थापनाको लागि निर्णय भएपनि त्यसको व्यवस्थापनका लागि सम्बन्धित स्थानीय तहलाई जिम्मा दिएको प्रमुख जिल्ला अधिकारी गंगाप्रशाद न्यौपानेले जानकारी दिएको छ।
हाललाई चार स्थानमा हेल्थ डेक्स स्थापना गर्न भनिएको छ । आवश्कताको आधारमा अन्य ठाउँमा पनि स्थापना गर्न सकिने प्रमुख जिल्ला अधिकारी न्यौपानेले बताए । तालिम प्राप्त जनशक्ति, उपकरण र औषधि अभाव हुन नदिन सम्बन्धित निकायसँग समन्वयका लागि आदेश दिएको उनले बताए।
स्वास्थ्यकर्मीलाई तालिमको व्यवस्थको जिम्मा जिल्ला अस्पताललाई दिएको छ । बाहिर जिल्लाबाट प्रवेश गर्ने नाकामा हेल्थ डेस्क राख्ने निर्णय भएको छ । यहाँका स्थानीय तहले सभा, समारोह, भोजभतेर तथा भेला नगर्न सूचना जारी गरेका बताए।
प्रतिक्रिया दिनुहोस !
