प्यूठान : प्यूठान नगरपालिकाले विजुवारस्थित कालिका विकास केन्द्र नेपालको सभाहलमा १२ बेडको क्वारेन्टाइन तयार पारेको छ । कोरोनाको संक्रमणको संभावित बिरामी राख्नका लागि कक्ष तयार भइसकेको नगरप्रमुख अर्जुन कुमार कक्षपतीले जानकारी गराए ।
कोरोनाको संक्रमणबाट हुन जोगिनका लागि क्वारेन्टाइनले विशेष राहत मिल्ने कक्षपतीले विश्वास राखे । यो सँगै नगरपालिकाले वडा नम्बर ४ स्थित खेलकुद मैदान पारीपट्टी बाझोबारीमा २५ बेड र पूण्यखोलास्थित खेलकुद कवर्ड हलमा १० बेड क्षमताको अरु क्वारेन्टाइन निर्माण प्रक्रिया अघि बढाएको छ ।
बिहीबारसम्म ती क्वारेन्टाइन तयार भइसक्ने नगरप्रमुख कक्षपतीले जानकारी गराए । उनले बाझोवारीमा क्वारेन्टाइन निर्माणका लागि शसस्त्र प्रहरी बल, कार्य तथा सीमा सुरक्षा विभाग (विपत व्यवस्थापन शाखा)बाट टेन्ट सहयोग भएको बताए । क्वारेन्टाइनमा पाँच÷छ जना स्वास्थ्यकर्मीलाई खटाइने छ । विपतको बेला खट्ने कर्मचारीलाई विशेष प्रोत्साहन गरिने समेत नगरप्रमुख कक्षपतीले बताए ।
झिमरुक गाउँपालिकाले पनि ओखरकोट मच्छि स्थित बालशिक्षा माध्यमिक विद्यालयमा ५ बेड क्षमताको क्वारेन्टाइन तयार पारेको छ । गाउँपालिकाका अध्यक्ष तिलक जिसीले क्वारेन्टाइनमा आवश्यक सामग्रीको व्यवस्थापन समेत तयार गरिएको बताए । भारतलगायत तेस्रो मुलुकबाट गाउँ भित्रने संख्या दिनानुदिन बढ्दै गइरहेकाले एक आपसमा सम्पर्क नगरी आफ्नै घरमा बस्न गाउँपालिकाले आव्हान समेत गरेको छ । भारत सहित अन्य मुलुकबाट गाउँ भित्रने संख्याको एकिन गर्न वडा वडामा तथ्यांक संकलन कार्य शुरु भइरहेको समेत जिसीले बताए ।
प्रतिक्रिया दिनुहोस !
