कोरोनाबारे परामर्श दिन धौलागिरी अस्पतालमा 'हेल्लो डाक्टर'

 बागलुङ : कोरोनाको आंशका भएको भन्दै बिरामी आउने क्रम बढेपछि धौलागिरी अञ्चल अस्पताल बागलुङले 'हेल्लो डाक्टर' सेवा सञ्चालनमा ल्याएको छ ।  अस्पतालमा कोरोनाको सम्भावित जोखिम र अन्य बिरामीको चाप बढेपछि लक डाउनको समयमा घरमै बसेर पनि डाक्टरको परामर्श लिने व्यवस्थासहित हेल्लो डाक्टर डेक्स स्थापना गरेको अस्पतालले जनाएको छ ।

कोरोना भाइरसको आंशका वा लक्षण देखा परेका बिरामीले धौलागिरी अञ्चल अस्पतालका डा. अजय पोखरेल ९८६८८३९८२९, आकाश चित्रकार ९८१९१५५१६४, सचिन कोइराला ९८४६६४७३७५ र धिरेन्द्र पौडेललाई ९८५११७८७९१ मा फोन गर्न सक्नेछन् ।

कोरोना भाइरस प्रभावित क्षेत्रबाट आएका र भाइरसको लक्षण देखा परेका नागरिकलाई फोनबाटै सल्लाह सुझाव दिइने अस्पतालका निमित्त मेडिकल सुपरिटेण्डेन्ट डा.शैलेन्द्र बि पोखरेलले बताए ।

बाहिरबाट आएका नागरिकलाई फोनबाटै डाक्टरले सुझाव दिने र उनीहरुले सोही अनुसारको सतर्कता अपनाउन सक्ने उनको भनाई छ । ‘यो हामी सबैका लागि गम्भिर संकट र चुनौतिको समय हो, अस्पतालमा अरु सामान्य खालका बिरामीको चाप धेरै हुँदा त्यसले पनि थप जोखिम बढाएको महुशुस गर्‍यौं,  डा.पोखरेलले भने, 'गम्भीर अवस्था बाहेकका हकमा घरमै बसेर पनि डाक्टरको सेवा र परामर्श दिने र सबै नागरिकलाई घरमै सुरक्षित बस्नुस् भन्ने हाम्रो अभिप्राय हो ।'

ज्वरो, रुघाखोकी र कोरोना भाइरससँग सम्बन्धित लक्षण देखा परेका नागरिकहरुले मात्रै डेक्समा फोन गर्न अस्पतालले आग्रह गरेको छ । सामान्य रोगका बिरामीहरुले डाक्टरलाई फोन नगर्न अस्पतालको आग्रह छ ।