बागलुङ : नोबेल कोरोना भाइरस (कोभिड -१९)को संक्रमणको जोखिम बढेसँगै बागलुङमा अत्यावश्यकीय पसलमा पनि दूरी कायम गरिएको छ । बजारका दैनिक उपभोग्य पसलमा बिहान र साँझ भीडभाड हुन थालेपछि बागलुङ उद्योग बाणिज्य सघंले जिल्ला प्रहरी कार्यालयसँगको पहलमा ग्राहकको लाइन बस्ने स्थानमा रेखांकन गरिएको छ ।
रेखांकन पछि पसलमा पनि भीड नहुने र कोरोनाको जोखिम रोकथाममा सहयोग पुग्ने बागलुङ उद्योग बाणिज्य सघंका अध्यक्ष युवराज राजभण्डारीले जानकारी दिए । 'एक ग्राहक पछि अर्को ग्राहक बस्नका लागि ३ फिटको दूरी कायम गरिएको छ,' अध्यक्ष राजभण्डारीले भने, 'बुधबार १० ठाउँमा बनाएका छौं, बाँकी पसलमा बिहीबार तयार गरिनेछ । र यसको प्रभावकारी कार्यान्वयनमा जोड दिइनेछ ।'
दैनिक उपभोग्य पसललाई नेपाल सरकारले अत्यावश्यकमा राखेको छ । जसका कारण अरु व्यापार व्यवसाय बन्द गरिए पनि किराना दैनिक उपभोग्य सामानका पसल भने सञ्चालनमा छन् । बागलुङमा पछिल्लो समय कोरोनाको जोखिम बढी देखिएको छ । खासगरी भारतसहित विभिन्न देशबाट आएकाबाट जोखिम देखिएको छ । धौलागिरी अञ्चल अस्पताल मार्फत कोरोना आंशकामा दुईजनाको स्वाब परीक्षणका लागि काठमाडौं पठाइएको छ ।
स्वाब संकलन गरिएका बिरामीमध्ये बानपा–७ का पुरुषको धौलागिरी अञ्चल अस्पताल बागलुङमा आइसोलेसनमा राखेर उपचार भइरहेको धौलागिरी अञ्चल अस्पताल बागलुङका निमित्त मेडिकल सुपरिटेण्डेन्ट डाक्टर शैलेन्द्र वि पोखरेलले जानकारी दिए ।
कोरोना संक्रमित १९ वर्षीयासँगै गत चैत ५ गते फ्रान्सबाट कतार हुँदै बागलुङ आएकी बागलुङ नगरपालिका ४ की एक महिलालाई भने घरमै क्वारेन्टाइनमा राखिएको छ ।
प्रतिक्रिया दिनुहोस !
