दार्चुला : अपिहिमाल गाउँपालिकाको क्वारेन्टाइनमा राखिएका ८ जना मध्ये ४ जनाले क्वारेन्टाइन छोडेर भागेका छन् । भारतको बङलोरबाट आएका ८ जनामध्ये गाउँपालिकाको वडा नम्बर ६ का एकै परिवारका ४ जनाले क्वारेन्टाइन छोडेर भागेको गाउँपालिकाका अध्यक्ष धर्मानन्द सिंह मन्यालले जानकारी दिए ।
उन्ले भने, 'क्वारेन्टाइनबाट भागेका उनीहरुलाई वडा अध्यक्षको निगरानीमा राखिएको छ । कोरोनाको संक्रमण रोक्न १४ दिनसम्म क्वारेन्टाइनमा राख्ने व्यवस्था मिलाइएको भए पनि क्वारेन्टाइन छोडेर भागेका हुन् ।'
प्रहरीले रोक्ने प्रयास गरे पनि उनीहरू भाग्न सफल भएको अध्यक्ष मन्यालको भनाइ छ । उनीहरुलाई परामर्श दिइ गाउँपालिकाको वडा नम्बर ५ रेलामा स्थापना गरेको क्वारेन्टाइनमा राखिएको छ । यस्तै मार्मा गाउँपालिकाको वडा नम्बर ३ लटिनाथमा रहेको रष्कोट माविमा स्थापना गरिएको ३० शैय्याको क्वारेन्टाइनमा गाउँपालिकाका विभिन्न स्थानका १७ जनालाई राखिएको गाउँपालिकाले जनाएको छ । भारतका विभिन्न सहरबाट आएका उनीहरुलाई गाउँपालिकाले क्वारेन्टाइनमा राखेको हो ।
जिल्लाको नौगाड गाउँपालिकाका ६ को सुकाखोलामा एक स्थानीयको घरमा क्वारेटाइन स्थापना गरी ३ जनालाई राखिएको गाउँपालिकाका अध्यक्ष प्रेम सिंह धामीले बताए । उनले गाउँपालिका २ दल्लेखमा रहेको पानीधारा आविमा १० शैय्याको क्वारेन्टाइन स्थापना गरेको पनि जानकारी दिए।
कोरोनाको संक्रमण गाउँघरमा फैलिन नदिन जिल्लाका सबै जसो स्थानीय तहले क्वारेन्टाइन स्थापना गरिरहेका छन् । दुहुँ गाउँपालिका ३ मा रहेको दुर्गास्थान प्राविमा क्वारेन्टाइन स्थापना गरी भारतबाट आएका ९ जनालाई राखिएको गाउँपालिकाका अध्यक्ष पुलेन्द्र बहादुर कार्कीले बताए ।
जिल्लाको महाकाली नगरपालिकामा ८ शैय्या, मालिकार्जुन गाउँपालिकामा ६ शैय्याको क्वारेन्टाइन स्थापना गरिएको छ । शैल्यशिखर नगरपालिका, ब्याँस गाउँपालिका र लेकम गाउँपालिकाले पनि क्वारेन्टाइन स्थापना गर्ने निर्णय गरेका छन् । विद्यालयसँगको समन्वयमा आवश्यकता अनुसार क्वारेन्टाइन स्थापना गर्ने निर्णय गरिएको सम्बन्धित स्थानिी तहका प्रमुखहरूले जानकारी दिएका छन् ।
प्रतिक्रिया दिनुहोस !
