भैरहवा : कानुनी विवादमा परेर बाल सुधार गृह (बाल कारागार) मा रहेका ७ जना थुनुवा र फैसला भएका (कैदी) लाई अभिभावकको जिम्मा लगाइएको छ । कोरोना संक्रमणलाई मध्यनजर गर्दै अभिभावकले आफ्नो सन्तान माग गरेको अवस्थामा जिम्मा लगाएर पठाउने सर्वोच्च अदालतले आदेश गरेको छ ।
सर्वोच्च अदालतको आदेश अनुसार ७ जनालाई अभिभावकको जिम्मा लगाइएको बाल सुधार गृह रुपन्देहीकी प्रमुख सुभद्रा गौतमले बताइन् । गृहबाट चोरी मुद्दामा एक वर्ष ३ महिना कैद सजाए पाएका रुपन्देहीको बुटवल उपमनपाका आशिष चौधरी (परिवर्तित नाम) अभिभावकको जिम्मा लगाइएको छ । त्यस्तै अन्य ६ जना पूर्पक्षाका लागि थुनामा थिए । जसमध्ये दुई जना चोरी, एक जना जबरजस्ती करणी र तीन जना लागुऔषध मुद्दाका रहेको प्रमुख गौतमले बताइन् ।
आदेशमा अदालत खोजेको बखत कैदी र थुनुवालाई जिम्मा लगाइएको अभिभावकले उपस्थित गराउर्नुपर्ने उल्लेख छ । 'अदालतले खोजेको बखत उपस्थित गराउनुपर्ने भन्दै अहिले हामीले गृहमा रहेका थुनुवा र फैसला भएकाहरुलाई अभिभावकको जिम्मा लगाएर पठाउने काम गरिरहेका छौँ,' प्रमुख गौतमले अन्नपूर्ण पोस्ट्सगँ भनिन्, 'अहिलेसम्म सात जनालाई जिम्मा लगाइएको छ ।'
लकडाउन भएकोले टाढा टाढाका अभिभावकहरु आफ्ना सन्तानलाई लिन आउन समस्या परेको छ । बालगृहमा सात जानलाई जिम्मा लगाइएपछि अहिले गृहमा ८६ जना छन् । भैरहवाको बाल गृहमा १८ वर्ष मुनिका पुरुषहरुलाई राख्ने गरिन्छ ।
'अन्य जिल्लाका थुनुवा र कैदीहरु पनि भएकोले लकडाउनका कारण अहिले त्यती अभिभावक आएका छैनन्,' उनले भनिन्, 'जो जो आएको छ उनीहरुलाई जिम्मा लगाएर पठाउँदैछौँ ।' उनले तत्कालका लागि अदालतको आदेश अनुसार जिम्मा लगाउने कार्य भइरहेपनि पछि पुन उनीहरु कानुनी प्रक्रिया वा सजाए भुक्तानका लागि आउनु÷नआउनुपर्ने विषयमा जानकारी नभएको बताइन्।
गृहमा लागुऔषध, चोरी, नकबजनी चोरी, सरकारी किर्ते छाप, अप्राकृतिक मैथुन, डाँका चोरी, अभद्र व्यवहारलगायत मुद्दा कैदी र थुनुवा छन् । त्यस्तै एक वर्षभन्दा कम कैद सजाए पाएर भैरहवा कारागारमा सजाए भुक्तान गरिरहेका तीनजना कैदीलाई छाडिएको छ ।
हालको कानुनी व्यवस्थालाई टेकेर कैद सजाए भुक्तान गर्न बाँकी रहेका दिनसम्मको दैनिक तीन सयको दरले जरीवाना असुल गरेर कारागारबाट तीन जना कैदीलाई छाडिएको भैरहवा कारागारका प्रमुख नारायण पन्थीले जानकारी दिए । एक दिन बराबर ३ सय रुपैयाँ जरिवानाको कानुनी व्यवस्था छ। उनका अनुसार कारागारबाट सवारी ज्यान, लागुऔषध र कुटपिट मुद्दाका कैदी छुटेका हुन् ।
प्रतिक्रिया दिनुहोस !
