जनकपुरधाम : प्रीय साथीहरु,
'विश्वव्यापी कोरोनाभाइरस महामारीको यस त्रासदीमा म सुरक्षित छु । सरकारले गरेको लकडाउन अवधिसम्म आफ्नो परिवारसहित घरमै बस्नेछु । कलेज लाइफमासँगै बिताएका त्यो सुनहरा क्षणहरु अहिले सम्झिदै छु । आउने दिनमा त्यसरी नै हामी खुब रमाइलो गरौंला भन्ने इच्छा छ । तिमीहरु पनि आ-आफ्नो घरमा सुरक्षित बसेका छौँ भनेर मैले विश्वास लिएको छु,' जनकपुरधामका समाजिक अभियन्ता सरोज रायले फेसबुकमा स्टाटस लेख्दैं २९ वर्ष अघिको साथीभाइसँगको फोटो पोस्ट गर्दै लेखेका छन् ।
उनले सबै साथीहरुलाई कोरोना भाइरससँग बच्न घरमै बस्न अनुरोध गरेका छन् । कोरोना भाइरसको महामारीले त्रासदीमा पुरा देश नै लक डाउन छ । यसबेला आफ्नो परिवारका सदस्य, इस्ट-मित्र, छिमेकी, स्कुल-कलेजका साथी, गुरु, शुभाचिन्तक आदि सबैलाई उनले सम्झिँदै एल्बममा संकलन गरेको तस्बिर पोस्ट गर्दै साथीलाई ट्याग गरेका छन् ।
व्यापार व्यवसायमा सधैं व्यस्त रहने बर्दिबास उद्योग बाणिज्य संघ बर्दिबासका वरिष्ठ उपाध्यक्ष कृष्णप्रसाद गौतम देश लकडाउन भएपछि उनी स-परिवारका साथमा घरभित्रै छन् । कृष्ण परिवारजनसँग दिनमा दुई पटक दोहोरी गाउँछन् । उनी लोकदोहोरीमा रुची राख्छन् । गलबन्दी च्यातियो तिम्ले तानेर, बोलाउन खोजेको आफ्नै ठानेर भन्ने गायक प्रकाश सपुतको भाकामा उनले करोना विरुद्धको सचेतनामुलक दोहोरी गीत रचेका छन् ।
लोकदोहोरीमा उनले कोरोनाबाट कसरी बच्ने हार्मुनियमको धुनमा गाउँछन् । उनकी श्रीमती राधा गौतम मादल ठोक्दै कृष्णले गरेको प्रश्नको उत्तर दोहोरीबाटै दिन्छिन् । कृष्णका चार वर्षीय नाती क्रिसब र ७९ वर्षीय आमा टंकमाया दोहोरीमा ताली पिट्दै भाका भन्दै रमाउँछन् । आमा- बुवा, हजुरआमाले गाएको दोहोरीको लाइभ कृष्णका छोरो केदारले फेसबुकमा डिजेको काम गर्छन्।
यस्तो छ, यी परिवारको दोहोरी गीत
कृष्ण : कोरोनाले संसार तर्सेको, काहाँबाट किटानु वर्षेको ?
गलबन्दी च्यातियो तिम्ले तानेर, बोलाउन खोजेको आफ्नै ठानेर
राधा : किटानुको नक्सा डल्ला छ, चाइनाबाट आएको हल्ला छ ।
गलबन्दी च्यातियो तिम्ले तानेर...............।
कृष्ण : डर भयो कोरोना आएर, सर्प बिच्छी चमेरा खाएर ।
गलबन्दी च्यातियो तिम्ले तानेर...............।
राधा : सबैजना कम्मर कसौन, क्वारेन्टान्मा बसौंन ।
गलबन्दी च्यातियो तिम्ले तानेर...............।
कृष्ण : मरिन्छ कि भनेर सचेत हुने हो, सरकारको आदेश मान्ने हो ।
गलबन्दी च्यातियो तिम्ले तानेर...............।
राधा : साग खोले खाएर पेट भरौं, जथाभावी हिडडुल नगरौं ।
गलबन्दी च्यातियो तिम्ले तानेर...............।
राष्ट्रिय लोक तथा दोहोरी गीत प्रतिष्ठान नेपाल प्रदेश-२ का संरक्षक रहेको कृष्ण भन्छन्, ' दोहोरीबाट रमाइलो पनि हुन्छ, साथीभाइलाई समाजिक सञ्जालबाट दोहोरी गाएर मनोरञ्जनसँग सचेत पनि गराइरहेका छौं ।'
देश लकडाउन भएपछि मानिस सहरबाट घर फर्किएका छन् । कोरोना भाइरसबाट चार दिनदेखि बच्न घरभित्रै छन् । अरु समयमा फुर्सद नपाउने अहिले पुरा तस्बिर खोज्दै एलम्ब पल्टाउँदै छन् । पुरान दिन सम्झिदै रमाइरहेका छन् । कति गीत गाइरहेका छन् ।
महोत्तरीको भंगहाका समाजिक अगुवा गोपाल प्रसाद बराल चालिस वर्षपछि फिल्म हेर्दै छन् । कोरोना भाइरसबाट उनले आफूलाई घरभित्र लक डाउन गरेपछ उनलाई समय कसरी बिताउने चिन्ता थियो । उनले समय कटाउने उपाय निकाले फिल्म हेर्ने ।
'फिल्म हेरेको जुग बितेको थियो । २०३६ सालमा हाइस्कुल छोडेको पछि काम व्यवस्थाले महिले फिल्म हेर्ने फुर्सद भएन, उनले भने, 'कोरोनाको महामारीले गर्दा धेरै वर्षपछि राम्रोसँग घर बस्न पाएको छु । अहिले काम केही छैन, बाहिर कहाँ निस्कुने, निस्किन सकिदैन । सुनेका फिल्म सम्झी-सम्झी ल्याप्टपमा डाउन लोड गरेर हेरिरहेको छु ।'
उनले पार्टीसन् हिन्दी फिल्म हेरिरहेका छन् । भारतबाट पाकिस्तान विभाजित भएको कहानी देखाइएको छ ।उनले फेसबुकमा लेखेका छन्, 'विद्यार्थी छँदा शनिबार 'कन्सेसन शो' मा केही सिनेमा हेरेको सम्झन्छु । सामान्यतया म सिनेमामा दिलचश्पी भएको प्राणी हैन । अहिले कोरोना सन्त्रासबाट बच्न 'होम क्वारेन्टाइन' मा बस्नु पर्दा समय कटाउन यही सहारा खोजे । यसो मोबाइलमा सर्च गर्दा निर्मल पाण्डेको 'ट्रेन टु पाकिस्तान' मुवी अगाडि परेछ, त्यसैलाई 'क्लिक' गरेर अगाडि बढियो ।
समाजिक अभियन्ता सरोज रायले फेसबुकमा पोस्ट गरेको साथीभाइसँगको २९ वर्ष अघि तस्बिर ।
प्रतिक्रिया दिनुहोस !
