धादिङका ५ सांसदद्वारा कोरोना कोषमा १ महिनाको तलब जम्मा

धादिङ : संघीय संसद तथा प्रदेश संसदमा धादिङ जिल्लाबाट प्रतिनिधित्व गर्ने ५ सांसदले आफ्नो एक महिनाको तलव सरकारले स्थापना गरेको कोरोना सचेतना कोषमा जम्मा गर्ने घोषणा गरेका छन् ।

धादिङ जिल्लाबाट प्रदेश सभामा प्रतिनिधित्व गर्ने बागमति प्रदेशका चारै जना प्रदेशसभा सदस्य राजेन्द्र पाण्डे, शालिकराम जम्कटेल, डा. रामकुमार अधिकारी र जगत सिंखडा अनि जम्केटल बागमती प्रदेशको आन्तरिक मामिला तथा कानुन मन्त्रीले कोरोना कोषमा आफ्नो एक महिनाको पारिश्रमिक बापतको रकम जम्मा गर्ने घोषणा गरेका हुन् । 

त्यस्तै धादिङ क्षेत्र नं १ का संघीय सांसद भूमि त्रिपाठीले पनि बिहीबार आफ्नो १ महिनाको तलव कोराना कोषमा जम्मा गर्ने घोषणा गरेका थिए ।  

कोरोना भाइरसको संक्रमण नेपालमा पनि देखिन थालेको अवस्थामा सबै तवरले तयारी रहन र सावधानी अपनाउन सासंदहरूले  धादिङका जनतालाई आग्रहसमेत गरेका छन् ।

उनीहरूले तीनै तहका सरकारले व्यवस्थित र प्रभावकारी काम गरिरहेकाले आतंकित नभइ सेल्फ क्वारेन्टाइनमा बस्न आग्रह गरेका छन् । कोरोना नियन्त्रणका लागि सबै पक्षबाट भएको सहयोगको उच्च प्रशंसा गर्दै सांसदले सहयोग गर्ने स्वास्थ्यकर्मी, सुरक्षाकर्मी लगायत सम्बद्ध सबैलाई धन्यवादसमेत दिएका छन् ।