बेनी : विश्वव्यापी महामारीको रुपमा फैलिएको कोभिड-१९ भाइरस रोकथामका लागि विदेशबाट आएकालाई राख्न बनाइएको म्याग्दीका क्वारेन्टाइनमा बस्नेको संख्या ४९ जना पुगेको छ । जिल्लाभर ११८ जना क्षमताको क्वारेन्टाइन बनाएर शनिबारदेखि विदेशबाट आएकालाई राख्न थालिएको थियो । सदरमुकाम बेनी र स्थानीय तहमा स्थापना भएका क्वारेन्टाइनमा बस्नेको हालसम्मको संख्या ४९ जना पुगेको सहायक सिडिओ महेश सुवेदीले जानकारी दिए ।
'बेनीको क्वारेन्टाइनमा बसेका २४ जनामध्ये चारजना विदेशबाट आएको १५ दिन पुरा गरेर घर फर्किएका छन्, 'उनले भने ,'जिल्लाभर चैत १ गते यता विदेशबाट आएका ११५ जनाको लगत संकलन भएको थियो ।'
धवलागिरी गाउँपालिकाका उपाध्यक्ष रेशम छन्त्यालले दुईजनालाई घरमै एकान्तबास र चारजनालाई क्वारेन्टाइनमा राखिएको बताए । मालिका गाउँपालिकाले दरवाङमा ८ शैयाको आइसोलेशन बनाएपनि विदेशबाट आएका, क्वारेन्टाइन र आइसेलेशनमा बस्नेको तथ्याङ्क सार्वजनिक गरेको छैन् ।
मंगला गाउपालिकाले विदेशबाट आएका ३० जना मध्य १५ दिन नकाटेका ९ जनालाई बाबियाचौरको मंगला शिक्षा क्याम्पसमा स्थापना भएको क्वारेन्टाइनमा राखिएको अध्यक्ष सतप्रसाद रोकाले बताए । रघुगंगा गाउँपालिकाले विभिन्न वडामा स्थापना गरेको क्वारेन्टाइनमा १७ जनालाई राखिएकोमा १५ दिन कटाएर दुईजना मंगलबार घर फर्केका स्वास्थ्य शाखा संयोजक टिकाबहादुर शाहीले बताए ।
धेरैजसोको विदेशबाट आएको १५ दिन काटेको र क्वारेन्टाइनमा बस्दा समाजले गलत व्यवहार गर्ने डरले गर्दा केही व्यक्ति क्वारेनटाइनमा आउन नमान्दा खाली भएका हुन् । म्याग्दीमा सरकारले तोकेको मापदण्ड अनुसार इन्टरनेटको समेत सुबिधा भएको क्वारेन्टाइन बनाइएको छ ।
एकजनाको नमुना पठाइयो
श्वासप्रस्वासमा समस्या देखिएपछि सोमबार बेनी अस्पतालको आइसोलेशनमा भर्ना भएकी २७ वर्षीया युवतीको स्वाब परीक्षणका लागि मंगलबार नमुना पोखरा पठाइएको सिडिओ ज्ञाननाथ ढकालले बताए । बागलुङ घर भई पर्वतको जलजला गाउँपालिकामा बस्ने ती युवती केही समयअघि विदेशबाट आएकी थिइन् । अस्पतालमा भर्ना हुँदा उनलाई रुघाखोकी र श्वासप्रश्वासमा समस्या देखिएको थियो ।
ज्वरो भने नदेखिएको अस्पतालले जनाएको छ। कोरोनाको संकास्पद बिरामीको उपचारका लागि बेनी अस्पतालमा ६ शैयाको आइसोलेशन बनाइएको छ ।
युवा परिचालन
धवलागिरी गाउँपालिकाले कोरोना भाइरस रोकथामका लागि सचेतना फैलाउन र लकडाउनको कार्यान्वयन गर्न २२ जनाको युवा समूह परिचालन गरेको छ । उनीहरुलाई कर सहित दैनिक एक हजार रुपैयाँ ज्याला दिइने अध्यक्ष थमसरा पुनले बताइन ।
मंगलबारदेखिनै नियुक्ति दिएर ताकम, ढोरपाटन, मराङ र मल्कवाङका नाकामा उनीहरुलाई खटाइएको छ । गाउँपालिकाभित्र आवतजावत बन्द, भेला र जमघट रोक्नुका साथै उनीहरुले समुदायमा कोरोना फैलने कारण, लक्षण र बच्ने उपायको विषयमा सचेतना फैलाउन जनप्रतिनिधि, कर्मचारी र सुरक्षाकर्मीलाई सहयोग गर्ने भएका छन् ।
प्रतिक्रिया दिनुहोस !
