बुटवल : कोरोना अस्पतालमा उपचारको लापरवाहीले ज्यान गुमाएका पाल्पा रिब्दिकोटका बाबुराम थापाको शब अझै उठाइएको छैन । कोरोना आशंकामा अस्पतालका चिकित्सकले 'पशु व्यवहार' गर्दा थापाको मृत्यु भएको थियो ।
तीन दिन अस्पतालमा बस्दा समेत कोरोना परीक्षण नगरी राख्दा उनको ज्यान गएको हो । लुम्बिनी प्रादेशिक अस्पतालले मृत्यु भएको तीन दिनपछि निमोनियाका कारण ज्यान गएको दाबी गरेको छ ।अस्पतालका मेडिकल सुपरिटेण्डन डा. राजेन्द्र खनालले निमोनियाका कारण उनको मृत्यु भएको बताए ।
सामान्य उपचारका उपकरण समेत नरहेको धागो कारखानाको बेडमा उनको चैत १६ गते मृत्यु भएको हो । उनी उपचारका लागि चैत १३ गते पुगेका थिए । सामान्य ज्वरोको चेकजाच गराउन गएका उनमा निमोनिया रहेको अस्पतालले बताएको छ । मृत्यु भएपछि मात्रै स्वाब परीक्षण गरिएको आफन्तले बताएका छन् । अस्पतालका अर्का डा. सुदर्शन थापाले कोरोना नेगेटिभ रिपोर्ट आए पनि सतप्रतिशत विश्वास गर्न नसकिने बताउने गरेका छन् ।
उनको शव अहिले पनि अस्पतालको शवगृहमा रहेको छ । मृतककी श्रीमती रीता थापाले लापरवाहीले श्रीमानको मृत्यु भएको भन्दै सत्यतथ्य रिपोर्टसहित कारवाही र क्षतिपूर्ति पाउनुपर्ने बताएकी छन् । 'लापरवाही गरेर श्रीमानलाई मारिएको हो, क्षतिपूर्ति पाउनुपर्छ,'उनको भनाई छ ।
दुई नाबालक छोरासहित रुपन्देहीको सैनामैनामा बस्दै आएकी उनलाई अस्पतालले अहिलेसम्म मृत्यु के कारणले भयो भन्ने जानकारी दिएको छैन । कोराना अस्पताल निर्माण गरेको बुटवल उपमहानगरपालिका र लुम्बिनी प्रादेशिक अस्पतालले यस विषयमा केही बोलेका छैनन्।
थापाका परिवार बस्दै आएको सैनामैना नगरपालिकाले भने राहत दिने जनाएको छ । नगरप्रमुख चित्रबहादुर कार्कीले मृतकका परिवारलाई राहत दिने विषयमा छलफल भइरहेको बताए ।
प्रादेशिक अस्पतालका चिकित्सककै दोहोरो भनाईले थापाले मलामी नपाउने शंका देखिएको छ । कोरोना फोकल पर्शन डा. थापाले कोरोना नभएको भन्न नसकिने बताए । उनले त्यसो भनिरहँदा आफन्तहरु परिवार र शव नजिक जान डराएका छन् ।
प्रतिक्रिया दिनुहोस !
