धादिङ : सरकारले लकडाउनको समय थप गरेसँगै हिँडेरै घर फर्कने मजदुरको लर्को लागेको छ । लक डाउनको समय थप गरेपछि धादिङ जिल्लाका विभिन्न उद्योग, कल–कारखाना लगायत विकास निर्माणका क्षेत्रमा मजदुरी गर्न आएका आफ्नै घर फर्कन थालेका हुन् ।
घर फर्किन भने उनीहरूलाई लकडाउनले समस्यामा पारेको छ । लकडाउनको समय अवधि थपिएपछि नजिक घर हुने मदजुर पैदलै यात्रा गर्न थालेका छन् । काम गर्ने उद्योगमा खानेकुराको अभाव हुन थालेको र परिवारसँग टाढा हुँदा धेरै समस्या आउन थालेपछि पृथ्वीराजमार्गमा पैदल हिँडेर यात्रा गरिरहेका भेटिन थालेका छन् । राजमार्गमा पैदल यात्रीहरू देखेपछि उनीहरूलाई भोकै हिँड्नु नपरोस् भनेर धादिङको थाक्रे गाउँपालिकाले भने खाजाको व्यवस्था गरेको छ ।
गाउँपालिका अध्यक्ष रामकुमार आचार्यले भने, ‘पैदल यात्रीलाई सकेसम्म नहिँड्न अनुरोध गर्ने तर हिँड्न अति आवश्यक भएमा सुरक्षित रहने सन्देशसहित खाजा पानीको व्यबस्था गरेका छौँ । भोको पेटलाई थोरै भए पनि राहत दिने उद्देश्यले खाजा र पानीको व्यवस्थापन मिलाएका हौँ, स्थानीय युवाहरुले देखाउनुभएको सक्रियतालाई हामीले सहयोग गरेका हौँ ।’
खाजामा फुरनदाना, चाउचाउ, बिस्कुट, पानी, रहेको छ ।
कोभिड १९ अर्थात कोरोना भाइरस संक्रमण रोक्नको लागि नेपालभर लकडाउन गरेपछि सवारी साधन मात्र होइन होटल लगाएत सबै पसल बन्द भएका छन् । आपतकालीन अवस्थामा हिँडेरै यात्रा गर्नुपर्ने यात्रीहरूको लागि गाउँपालिकाले खाजाको व्यवस्था गरेको हो ।
प्रतिक्रिया दिनुहोस !
