छैठौं कोरोना संक्रमण पुष्टि भएकी ६५ वर्षीया धौलागिरी अस्पताल भर्ना

बागलुङ : छैठौं कोरोना संक्रमण पुष्टि भएकी बागलुङ नगरपालिका ३ गौडाकोटकी ६५ वर्षीयालाई धौलागिरी अञ्चल अस्पतालमा भर्ना गरिएको छ । घरमै होम क्वारेन्टाइनमा बस्दै आएकी महिलालाई कोरोना पुष्टि भएसँगै बिहीबार राति धौलागिरी अञ्चल अस्पतालमा ल्याएर आइसोलेसन वार्डमा भर्ना गरेर उपचार सुरु गरिएको छ । 

संक्रमित महिलाको स्वास्थ्य अवस्था भने सामान्य रहेको धौलागिरी अञ्चल अस्पतालका निमित्त मेडिकल सुपरिटेण्डेन्ट डा.शैलेन्द्र बि पोखरेलले बताए । महिलालाई कोरोना पुष्टि भएसँगै बागलुङमा कोरोना संक्रमितको संख्या दुई पुगेको छ । यसअघि बागलुङ नगरपालिका-४ कुँडुलेकी १९ वर्षीया किशोरीलाई कोरोना संक्रमण पुष्टि भएको थियो । उनको पनि धौलागिरी अस्पतालकै आइसोलेशन वार्डमा उपचार भइरहेको छ । 'उपचाररत दुवै संक्रमितको स्वास्थ्य अवस्था सामान्य छ,' डा. पोखरेलले भने, 'हामी सुरक्षित तरिकाले उपचारमा खटिरहेका छौं, तपाईहरु घरमै बस्नुहोस्, गम्भीर समस्या भए अस्पताल उपचार सेवा प्रदान गर्न तयार छ ।'

कतार एयरवेजको क्यूआर ६५२ नम्बरको बिमानबाट नेपाल आएका काठमाडौंका किशोरीलाइै संक्रमण पुष्टि भएपछि सोही विमानमा सवार यात्रुको खोजी गर्ने क्रममा बागलुङका चारजना रहेको पाइएको थियो।

जसमध्ये परीक्षणका क्रममा बागलुङ नगरपालिका-४ कुँडुलेकी १९ वर्षीया किशोरीलाई कोरोना संक्रमण पुष्टि भएको थियो । त्यसपछि सोही विमानमा सवार बानपा ३ का यी महिलाको पनि स्वाब परीक्षणमा पठाइएको थियो । 

बागलुङमा संक्रमण पुष्टि भएकी दुवै किशोरी र महिला बेल्जियमबाट बागलुङ आउँदा सँगै यात्रा गरेका थिए । किशोरीको अवस्था अहिले पनि सामान्य भएकाले दोस्रो पटकको स्वाब परीक्षणका लागि पठाइएको छ ।

बिहीबार संक्रमणको पोजेटिभ रिपोर्ट आएका महिला फागुनको दोस्रो सातामा कान्छी छोरी भेट्नका लागि बेल्जियम पुगेकी थिइन् । छोरी भेटेर दुई सातामै नेपाल फर्किएकी महिलामा कुनै लक्षण नभएको भन्दै धेरै दिनसम्म उनको नमुना संकलन समेत गरिएको थिएन । 

तर, जिल्लामा जोखिम बढ्दै गएपछि एकै विमानमा सवार भएका बागलुङका चारैजनाको नमुना स्वाब परीक्षण हुनुपर्ने दबाब तीव्र बन्दै गएकाले नमुना संकलन गरी पठाइएको थियो ।संक्रमित युवति र महिला सवार विमानमा सँगै आएका जिल्लाको ढोरपाटनका एक युवा र बागलुङ नगरपालिकाकै अर्का युवकको रिपोर्ट भने नेगेटिभ आएको छ । 

संक्रमित बानपा ४ कुडुलेकी युवतीसँगै काठमाडौं उत्रिएर पोखरा हुँदै बागलुङ आएका महिला घरमै परिवारसँगै बसेकी थिइन् । उनको परिवारमा ९० बर्षिया ससुरा,बुहारी र दुई नाती छन् । एउटै विमानमा आएका काठमाण्डौका युवतिलाई कोरोना संक्रमण पुष्टि भएर कुडुलेका किशोरीलाई सामान्य ज्वरोको लक्षण देखिएपछि मात्रै ती महिला होम क्वारेन्टाइनमै छुट्टै बस्दै आएकी छन् । 

जिल्लामा दुईजना संक्रमित फेला परेसँगै कोरोना भाइरस (कोभिड-१९) को संक्रमणको तीव्र जोखिम देखिएको भन्दै बागलुङमा त्रास बढेको छ । कोरोना संक्रमण देखिएका कुडुलेकी किशोरीको परिवारका परिवारका ७ जना सदस्य सहित ११ जनाको नमुना स्वाब पठाइएकोमा संक्रमित किशोरीका बुवा, हजुर बुवा, हजुआमा, फुपु, फुपुका छोरा र छोरीमा संक्रमण नभएको रिपोर्ट आएको छ । अन्य चारजनाको भने रिपोर्ट आउन बाँकी छ ।