राउटे महामुखियाको सरकारलाई आग्रह, ‘मेरो जनतालाई पनि जोगाइदेऊ’
चैत २४, २०७६ सोमबार १४:३१:०
सुर्खेतः खोला किनारमा केही छाप्रा छन् । बस्तीलाई लकडाउन गरिएको छ । हिजोआज बस्तीमा जोकोही पस्दैनन् । न त बस्तीका मान्छे नै बाहिर निस्कने आँट गर्छन् । बरु बस्तीमा बारिहबाट कोही पस्न खोज्दा उनीहरू नै रोक्छन् । अन्य समुदायका मान्छेलाई आफ्नो बस्तीमा नआइदिन आग्रह गर्छन् ।
जंगलमा घुमन्ते जीवन बिताउँदै आएको राउटे समुदाय यतिबेला लकडाउनमा छ । सुर्खेतको भेरीगंगा नगरपालिकास्थित छिन्चु खोलाको किनारमा रहेको राउटे बस्तीलाई पनि लकडाउन गरिएको छ । बन्यजन्तुको शिकार र काठका सामग्री बिक्री गरेर जीवन निर्वाह गर्ने राउेटलाई पनि कोरोनाको त्रासले छोएको छ । यही त्रासले उनीहरू हिजोआज जंगल र बस्तीमा जान छाडेका हुन् ।
लकडाउनले बस्तीमा खाद्यान्न संकटको पीरलो छ । तर पनि कोरोना संक्रमणको त्रासले उनीहरू खाद्यान्नको जोहो गर्नका लागि बाहिर जान छाडेका छन् । बरु बस्तीमा खाद्यान्न वितरणका लागि बेलाबेलामा सरकारी टोली पुग्ने गरेका छन् । बस्तीमा सरकारी टोली पुग्ने बित्तिकै राउटे मुखियाले प्रश्न गरी हाल्छन्,‘देशमा अवस्था कस्तो छ ? यो नयाँ रोग आयो भनेका छन् । केही नोक्सान त भएको छैन नि ?, हाम्रो बस्तीमा पनि रोग आउँछ की ?’
विश्वभर महामारीको रूप लिएको कोरोनाबारे राउटेले नजिकैका अन्य बस्तीबाट सुनेका हुन् । अन्य समुदायका व्यक्ति र सरकारी निकायले कोरोनाले मान्छेको ज्यान लिने बताएपछि राउटेमा पनि त्रास बढेको छ । राउटे समुदायका महामुखिया महिनबहादुर शाही भन्छन्,‘बाहिर (विदेश) धेरै मान्छे मरेका छन् भन्ने सुनेको छु, हाम्रो देशमा पनि आयो भन्छन् । यसबाट बच्नु त पर्यो, अब सरकारले मेरो जनतालाई पनि जोगाइदिनु पर्यो ।’ राउटेहरू सामान्य रोग लाग्दा अस्पतालमा उपचार गराउँदैनन् । जंगलमा पाइने जुडिबुटीको प्रयोग गर्छन् । तर कोरोनाबारे धेरै सुनेपछि भने उनीहरूमा त्रास देखिन्छ । यही त्रासले आफूहरू बस्तीबाहिर जान छाडेको महामुखिया शाहीले सुनाए ।
राउटेले हालसम्म नेपाली नागरिकता लिएका छैनन् । यसअघि दैलेखको गुराँस गाउँपालिकाको स्थायी बासिन्दाका रूपमा पहिलोपटक सरकारी परिचयपत्र लिएका थिए । राउटेको अवस्था बुझ्न र उनीहरूको स्वास्थ्य परीक्षणका लागि बस्तीमा पुगेका गुराँस गाउँपालिकाका अध्यक्ष खेमराज वलीसँग राउटेले आफूहरूलाई सुरक्षित राखिदिन आग्रह गरे । छिन्चु खोला किनारमा गर्मीले समस्या भएको र कोरोनाको त्रास बढेको भन्दै राउटेले आफूहरूलाई गुराँस गाउँपालिकामा स्थानान्तरण गर्न माग गरे । तर गाउँपालिका अध्यक्ष वलीले लकडाउनका कारण तत्काल बस्ती सार्न नमिल्ने भन्दै केहीदिन धैर्य गर्न आग्रह गरे ।
राउटे बस्तीमा हाल भेरीगंगा नगरपालिकाले दुई जना स्वास्थ्यकर्मी खटाएको छ । उनीहरूले राउटेको नियमित स्वास्थ्य जाँज गर्दै आएका छन् । यस्तै राउटे बस्तीको निगरानीका लागि प्रहरी पनि खटाइएको छ । उनीहरूले राउटेलाई बाहिर जान र अन्यलाई बस्तीमा प्रवेश गर्न रोक लगाउने गरेका हुन् । कोरोनाको त्रासकै कारण राउटेले पछिल्लो समय मास्क लगाउन थालेको भेरीगंगाका मेयर भुपेन्द्रबहादुर चन्दले बताए । राउटे बस्ती पनि जोखिममा रहेकाले आफूहरूले कडा निगरानीमा राखेको उनको भनाइ छ । बस्तीलाई लकडाउन गरिएको र खाद्यान्न संकट हुन नदिन प्रदेश सरकारसँग पनि समन्वय भइरहेको चन्दले जनाए । राउटे बस्तीमा हाल एकसय ५० जना छन् ।
प्रतिक्रिया दिनुहोस !
