सुर्खेत : जुम्लाका विभिन्न स्थानबाट एकै दिन तीनसय २४ जनाको स्वाब संकलन गरिएको छ । जुम्लाको विभिन्न स्थानीय तहमा भारत तथा तेस्रो मुलुकबाट आएका तीनसय २४ जनाको कोरोना परीक्षणका लागि मंगलबार स्वाब संकलन गरिएको थियो । घुम्ती शिविरमार्फत एकै दिन संकलन गरिएको स्वाब परीक्षणका लागि नेपाली सेनाको हवाईजहाजमार्फत काठमाडौं पठाइएको हो ।
जुम्ला विमानस्थल, सिंजा कनकासुन्दरीको लासीपाटन र हिमा गाउँपालिकाको देवारगाउँमा घुम्ती शिविर सञ्चालन गरेर स्वाब संकलन गरिएको प्रमुख जिल्ला अधिकारी दुर्गा बञ्जाडेले बताइन् ।उनका अनुसार कर्णाली स्वास्थ्य विज्ञान प्रतिष्ठान जुम्लाका डाक्टर र काठमाडौंबाट जहाजमा आएका डाक्टरले एकै दिन तीन स्थानमा पुगेर स्वाब संकलन गरेका हुन् । दुईसय ५३ जनाको स्वाब संकलन गर्ने लक्ष्य भए पनि थप एकसय जनाको स्वाब संकलन गर्न सफल भएको उनको भनाइ छ ।
जुम्लाको चन्दननाथ नगरपालिका, तिला, तातोपानी, पातारासी र गुठिचौर गाउँपालिकाको जुम्ला विमानस्थलबाट एकसय ५० जना, हिमा गाउँपालिकाको देवागाउँबाट एकसय २४ र कनकासुन्दरी गाउँपालिकाबाट ५० गरी जम्मा तीनसय २४ जनाको स्वाब संकलन गरी जहाजबाट काठमाडौं पठाइएको हो ।
कर्णाली स्वास्थ्य विज्ञान प्रतिष्ठानका अस्पताल निर्देशक डाक्टर मंगल रावलले भारततबाट आउनेहरुबाटै कर्णालीमा कोरोना संक्रमणकोे जोखिम बढेको बताए । भारत तथा तेस्रो मुलुकबाट भित्रिनेको संख्या धेरै भएकाले जुम्लालाई कोरोना भाइरस संक्रमणको (रिक्सजोन)मा राखिएको छ ।
प्रतिक्रिया दिनुहोस !
