विदेशबाट आएका दुई जनालाई उच्च ज्वर आएपछि आइसोलेसनमा

भक्तपुर : विदेशबाट आएर घरकै क्वारेन्टाइनमा बसेका भक्तपुरका दुईजना पुरुषलाई भक्तपुर अस्पतालको आइसोलेसनमा राखिएको छ । उच्च ज्वर आएपछि भक्तपुर चाँगुनारायण नगरपालिका ६ नगरकोटका ती दुई जना बुधबार भक्तपुर अस्पताल पुगेका थिए । एकजना १९ दिनअघि संयुक्त अरब इमिरेट्सको दुबईमा नेपाल आएका थिए । अर्को भने १८ दिनअघि भारतबाट स्वदेश फर्किएका थिए ।

भक्तपुर अस्पतालकी मेडिकल सुपरिटेन्डेन्ट डा. सुमित्रा गौतमले दुवैमा उच्च ज्वर आएकाले स्वाब संकलनपछि अस्पतालको आइसोलेसनमा राखिएको बताइन् । उनका अनुसार अस्पतालले बुधबारसम्ममा ९३ जना विदेशबाट भक्तपुर फर्किएकाहरुको स्वाब संकलन गरिसकेको छ । जसमध्ये ६० जनाको रिपोर्ट प्राप्त भएको र उनीहरूमा कोरोना भाइरस परीक्षण नेगेटिभ आएको मेसु डा. गौतमले जानकारी दिइन् ।

‘बुधबारमात्रै १६ जनाको स्वाब संकलन गरियो’, उनले भनिन्, ‘अस्पतालको आइसोलेसनमा उपचार पाएर १३ जना घर फर्किसकेका छन् ।’

उनका अनुसार अस्पतालमा २१ शैय्याको आइसोलेसन वार्डको व्यवस्था गरिएको छ । कोरोना भाइरससम्बन्धी उपचारमा संलग्न हुने चिकित्सक तथा स्वास्थ्यकर्मीलाई अस्पतालमै खाने बस्ने व्यवस्था गरिएको छ ।

काठमाडौं महाराजगञ्जको त्रिवि शिक्षण अस्पतालपछि भक्तपुर अस्पतालमा दोस्रो पीपी बुथ निर्माण भएको छ । त्यसैले कोरोना भाइरसको संक्रमणको आशंकामा अस्पतालमा आएकाको स्वाब संकलन गर्न अस्पताललाई सहज भएको मेसु डा. गौतम बताउँछिन् ।

‘पीपी बुथको व्यवस्थासँगै कोरोना भाइरस संक्रमणको आशंका भएकाहरुको स्वायब संकलन गर्नको अस्पताललाई सहज भएको छ’, उनले भनिन्, ‘स्वाब दिन जति जना आए पनि हामी संकलन गर्छौं । अहिलेसम्म कसैलाई फर्काएका छैनौं ।’

प्रमुख जिल्ला अधिकारीको संयोजकत्वमा रहेको जिल्ला विपद् व्यवस्थापन समितिले विदेशबाट आएर भक्तपुर बसेका सबैको स्वाब परीक्षण गर्ने भनेपछि अस्पताल पुग्नेहरुको संख्या बढेको छ । मंगलबार १४ जना पुगेकोमा बुधबार १६ जना स्वाब परीक्षणको लागि अस्पताल पुगेका थिए ।

भक्तपुरमा चैत १ गतेपछि विदेशबाट आउने एकसय ३१ जनाको पहिचान भइसकेको जिल्ला प्रशासन कार्यालयले जनाएको छ । कार्यालयका अनुसार भक्तपुरका विभिन्न अस्पतालमा १७ वटा भेन्टिलेटर र ८७ वटा आइसोलेसन शैय्या तयारी अवस्थामा राखिएको छ ।

त्यस्तै कोरोना भाइरस संक्रमितको ओसारपसार गर्न जिल्लाका चार वटा एम्बुलेन्सलाई विशेष रूपमा मोडिफाइ गरिएको महानगरीय प्रहरी परिसर भक्तपुरका प्रमुख प्रहरी उपरीक्षक सविन प्रधानले जानकारी दिए । अरु २२ वटा एम्बुलेन्सलाई पनि आवश्यकताअनुसार मोडिफाइ गर्ने प्रक्रिया अघि बढाइएको उनको भनाइ थियो ।

जिल्लामा कोरोना भाइरस संक्रमणको आशंका भएका व्यक्तिलाई घरसम्म लिन जानको लागि जिल्ला स्वास्थ्य कार्यालयका प्रमुखको संयोजकत्वमा पासिएन्ट रिसिभिङ टीम (पीआरटी) गठन गरिएको छ । भक्तपुरका चार नपाका ३८ वटा वडामा समेत उक्त टीम सक्रिय रहेको प्रहरी उपरीक्षक प्रधानले जानकारी दिए ।