कालिकोट : नरहरीनाथ गाउँपालिका २ चौथिकोटका दुर्ग दर्जीको परिवारमा आठ सदस्य छन् । तर गाउँपालिकाले उनको घरको पुगेर दुईवटा मास्क र एउटा साबुन दियो । आठजनाको परिवारमा दुईवटा मात्र मास्कले कसको मुुख ढाक्ने ? यतिबेला यो परिवार अन्योलमा छ ।
दर्जीले भने, ‘परिवारमा आठजना छौं, दुईवटा मास्कले कसको मुख ढाकौं । गाउँपालिकाले राहतको नाममा आहत दिएको छ, देखाउनलाई मात्र राहत नदिए पनि हुन्छ ।’ नरहरीनाथ गाउँपालिका १ का दर्जीको पनि नौजनाको परिवार छ । तर गाउँपालिकाले दुई मास्क र एक साबुन दिएको छ । उनले भने, ‘हामी कसले लगाउने हो दुई मास्क ? यस्तो राहत दिनुभन्दा नदिएको भए हुन्थ्यो ।’
स्थानीय प्रकाश बिष्टको पाँचजनाको परिवार छ । तर उनको परिवारमा चारवटा मास्क र एक साबुन दिइएको छ । स्थानीय सितल बिष्टले गाउँपालिकाले नागरिकको आवश्यकताअनुसार राहत कार्यक्रम नल्याएको बताए । उनले भने, ‘गाउँमा धेरै परिवार रोगभन्दा बढी भोकको चिन्ता छ, १२ जना परिवार हुने घरमा पनि दुईवटा मात्र मास्क र एउटा साबुन दिएको छ । राहतको नाममा फोटो खिच्ने काम भएको छ, हामीले राहत पाउन सकेनौं ।’
जिल्लाको सन्नीत्रिवेणी र शुभकालिका गाउँपालिकामा पनि एक परिवारलाई दुई मास्क र एक साबुनका दुरले राहत बाँडिएको छ । नरहरीनाथ गाउँपालिका अध्यक्ष धीरबहादुर बिष्टले हरेक वडामा काम गरी छाक टार्ने घरधुरीको तथ्यांक संकलन गरी थप राहत वितरण गर्ने कार्य तत्काल गर्ने बताए । सबै नागरिकलाई मास्क खरिद गर्न नसकिएको उनको भनाइ छ ।
प्रतिक्रिया दिनुहोस !
