बेंसीसहर : कोभिड -१९ संक्रमण जोखिमका कारण बन्द भएका लमजुङको दोर्दीखोलामा निर्माणधीन जलविद्युत आयोजना स्थानीय तहसँगको लिखित शर्तपछि सूचारु भएका छन्।
दोर्दी गाउँपालिका र जलविद्युत आयोजनाबीच आयोजना सञ्चालनसम्बन्धी आचारसंहिता बनाएर सूचारु गरिएको हो । नोभेल कोरोना भाइरस (कोभिड १९) संक्रमण फैलन नदिन नेपाल सरकारले लागू गरेको लकडाउनको सबै सावधानीको पालना गर्नका लागि आचारसंहिता बनाइएको छ । आचारसंहिता पालना गर्ने गरी दुवै पक्षबीच सम्झौता भएर आयोजना सञ्चालन गर्न अनुमति दिइएको गाउँपालिका अध्यक्ष ओमबहादुर गुरुङले बताए ।
जलविद्युत आयोजनाले नेपाल सरकारको लकडाउनको नियमलाई पूर्णरुपमा पालना गर्ने, बढीमा १५÷१५ जनाको समूहमा ३÷३ मिटरको दूरीमा रहेर काम गनुपर्ने, कम्पनीले आफ्नो कार्य क्षेत्रलाई सम्बन्धित वडाको वडाध्यक्ष र सरोकारवालाको उपस्थितिमा कार्यक्षेत्र तोकेर त्यसलाई निषेधित क्षेत्रको रुपमा सार्वजनिक सूचना टाँस गरी काम गर्नुपर्ने सर्त रहेको अध्यक्ष गुरुङले बताए ।
उपाध्यक्ष दीलबहादुर घलेका अनुसार आयोजनाको कार्य क्षेत्रभित्र तोकिएको कर्मचारी तथा कामदार बाहेक अन्य व्यक्तिलाई प्रवेश गर्न र भित्रको कर्मचारी र कामदारलाई तोकिएको क्षेत्र भन्दा बाहिर निस्कन पाइने छैन । कार्य क्षेत्रभित्रको कर्मचारी तथा कामदारको आवास र खानाको व्यवस्था तोकिएको क्षेत्रभित्र हुनुपर्ने छ । अन्य बजार बस्तीमा लकडाउन अवधिभर खाना बस्न पाइने छैन ।
अफिस क्वारेन्टाइनमा बसेर १४ दिन पुरा गरी सकेको कर्मचारी र कामदार बाहेक अन्यलाई प्रवेश निषेध गरिएको छ । कार्यरत कर्मचारी र कामदारको स्वास्थ्यमा आउन सक्ने सम्पूर्ण जिम्मेवारी कम्पनी स्वंयले व्यवस्थापन गर्ने सहमति भएको छ । कम्पनीका साधनहरु अन्य आवश्यक खाद्यान्न ढुवानीको अवस्था बाहेक तोकिएको कार्यक्षेत्र भन्दा बाहिर लान र ल्याउन पाइने छैन । स्थानीय स्तरमा लकडाउन अवधिभर पर्न सक्ने विविध समस्याहरु स्वंय कम्पनी र प्रभावित क्षेत्रको सरोकारवालाहरुसंग कम्पनीले सहकार्य र समन्वय गर्नुपर्ने छ ।
आयोजनाको सबै कर्मचारी र कामदारको लिखित विवरण गाउँपालिकालाई उपलब्ध गराउने भएको छ । गाउँपालिकाले गाउँपालिका बाहिरका व्यक्तिलाई लकडाउन अवधिभर निषेध गरिएकाले लामो दूरीबाट आउने साधन आउन नपाइने भएको छ । अत्यावश्यक सामाग्री लिएर आउनुपर्ने भएमा गाउँपालिकाको अनुमति लिएर मात्र स्वास्थ्य चेकजाँच गरी आउने व्यवस्था गरिएको गाउँपालिका अध्यक्ष गुरुङले बताउनुभयो ।
लकडाउनको अवस्थामा तोकिएको अवस्थाको निती नियमलाई पालना गर्ने र सरकारबाट थप कडा निति आएमा स्वत सम्झौता खारेज हुने जनाएको छ । दोर्दीखोलामा निर्माणधीन २५ मेगावाटको माथिल्लो दोर्दी 'ए' जलविद्युत आयोजनाको काम आंशिक मात्रामा सुरु भएको छ । आयोजनाका प्रवद्र्धक कम्पनी लिवर्टी इनर्जी लिमिटेडका सञ्चालक राजेन्द्र वस्तीका अनुसार टनेल र ड्यामको काम भइरहेको छ । पावरहाउसको काम भने हुन सकेको छैन ।
दोर्दीखोलामा ५४ मेगावाटको सुपरदोर्दी जलविद्युत आयोजना 'ख', २५ मेगावाटको माथिल्लो दोर्दी 'ए', १२ मेगावाटको दोर्दी-१, २७ मेगावाटको दोर्दीखोला जलविद्युत आयोजना र छ्याङदी खोलामा ४ मेगावाटको माथिल्लो छ्याङ्दी जलविद्युत आयोजना निर्माणधीन छन् ।
प्रतिक्रिया दिनुहोस !
