जोमसोम : मुस्ताङका ३ पालिकाले अधिकृत सातौ तहको चिकित्सक उपलब्ध गराइदिन जिल्ला प्रशासन कार्यालय मुस्ताङसमक्ष माग गरेका छन् । हाल विश्वव्यापी माहामारीको रूपमा फैलिएको नोवल कोरोना भाइरस ( कोभिड–१९) को संक्रमणकालीन अवस्थालाई मध्यनजर गर्दै लोमान्थाङ, लोघेकर दामोदरकुण्ड र थासाङ गाउँपालिकाले अधिकृत सातौ तहको एमबिबिएस उर्तीण चिकित्सकको माग गरेका हुन् ।
मुस्ताङका ५ स्थानीय तहमा हाल ५६ जना स्वास्थ्यकर्मी छन् । उनीहरू सबै अहेब, अनमी र एच हुन् । योग्यता र दक्षताप्राप्त चिकित्सक पालिकामा नभएको उल्लेख गर्दै ३ पालिकाले हाल जोमसोम अस्पतालमा सातौ तहका एमबिबिएस उर्तीण र कार्यरत चिकित्सक संक्रमणकालीन अवधिसम्म खटाइदिन माग गरेका हुन् । योग्यता प्राप्त चिकित्सकको अभावले कोरोना स्वास्थ्य परीक्षण तथा कुनै अप्ठ्यारो पर्दा समस्या आइपर्ने जनाउँदै स्थानीय प्रशासनलाई पत्रमार्फत अनुरोध गरेको लोघेकर दामोदरकुण्ड गाउँपालिकाका अध्यक्ष लोप्साङ छोम्फेल बिष्टले जानकारी दिए ।
उनले पालिकामा भएका स्वास्थ्यकर्मीले सामान्य जरो नाप्ने काम मात्र भइरहेको र भरपर्दो स्वास्थ्य परीक्षण गराउन सातौ तहका चिकित्सक आवश्यक परेको बताए ।
म्याग्दी र मुस्ताङसँग सिमाना जोडिएको थासाङ गाउँपालिकाले पनि सातौ तहको चिकित्सक माग गरेको प्रमुख प्रशासकीय अधिकृत सन्तोषकुमार खत्रीले जानकारी दिए । उनले जोमसोम अस्पतालमा हाल कार्यरत ४ जना चिकित्सकलाई संक्रमणकालीन अवस्थासम्म पालिकालाई सघाइनु पर्नेमा जोड दिए । थासाङको लेते प्राथमिक स्वास्थ्य केन्द्रमा एकजना मात्र सातौ तहका चिकित्सक रहेको र उनी सधैं काममा खटिनुपर्ने भएकाले थप एक चिकित्सक आवश्यक परेको उल्लेख गरे ।
उनले लेते प्राथमिक स्वास्थ्य केन्द्रमा ल्याव टेक्निसियन र एक्सरे टेक्सियनसमेत नभएकाले काम गर्न असहज परेको बताए । यस्तै लोमान्थाङ गाउँपालिकाले पनि जोमसोम अस्पतालका चिकित्सकलाई विभाजन गरी कोरोना संक्रमणकालसम्म खटाइदिन अनुरोध गरेको छ ।
मुस्ताङ सदरमुकाम जोमसोम अस्पतालमा हाल एक स्थायी र ३ जना करारका एमबिबिएस चिकित्सक छन् । मुलुकभर कोरोनाका संभावित त्रास बढेको भए पनि मुस्ताङमा कोरोना परीक्षण गर्ने तथा संम्भावित कोरोनाका बिरामी देखिएका छैनन् । लक डाउनका कारण सामान्य अवस्थाका सेवाग्राही अस्पतालमा नआएको र जिल्लामा कोरोना संक्रमित नभएकाले जिल्ला अस्पतालका चिकित्सक फुर्सदिला छन् । पालिकाले फुर्सदिला अवस्थामा रहेका चिकित्सकलाई केही समयका लागि समायोजन गर्न स्थानीय प्रशासनलाई अनुरोध गरेका हुन् । उनीहरूले दुर दराजका स्थानीयलाई भरपर्दो कोरोना स्वास्थ्य परीक्षण गर्न चिकित्सक आवश्यक भएको जनाएका छन् ।
तर ,वारागुङ मुक्तिक्षेत्र र घरपझोङ गाउँपालिका जोमसोम अस्पतालकै पहुच नजिक रहेकाले उनीहरूले चिकित्सक माग गरेका छैनन्। लोमान्थाङमा ४ जना, लोघेकर दामोदरकुण्डमा ६ जना , वारागुङ मुक्तिक्षेत्रमा ९ जना, घरपझोङमा १२ जना र थासाङ गाउँपालिकामा २५ जना स्वास्थ्यकर्मी कार्यरत छन् । पालिकाले लकडाउनअघि विदेश बस्ने नेपाली जिल्ला भित्रिएकाले भरपर्दो स्वास्थ्य परीक्षण आवश्यक भएको जनाएका छन् ।
मुस्ताङका प्रमुख जिल्ला अधिकारी वेदप्रकास अर्यालले कोरोना संक्रमणकालीन अवस्थासम्म पालिकाले मौखिकरूपमा चिकित्सकको माग गरेको जानकारी दिए । उनले यसबारे अस्पतालसँग मौखिक सहमति भएको र पालिकाले आन्तरिक व्यवस्थापन पूरा गरेपछि चिकित्सक खटाइने बताए ।
प्रतिक्रिया दिनुहोस !
